वीरगंज । पर्सा निर्वाचन क्षेत्र नम्बर–२ की उम्मेदवार रिमा यादवले बुधबार बहुदरमाई नगरपालिका–३, नगरदाहा क्षेत्रमा घरदैलो कार्यक्रम सम्पन्न गरेकी छन् । घरदैलोमा उनले मतदातासँग प्रत्यक्ष संवाद गर्दै मत मागेकी छन्।
यादवले स्थानीय टोल–बस्तीमा पुगेर विकास, सुशासन र रोजगारी सिर्जनालाई प्राथमिकता बनाउँदै आफू चुनावी मैदानमा उत्रिएको र परिवर्तनका लागि सूर्य छापमा मतदान गर्न मतदातालाई आग्रह गरेकी छिन्। कार्यक्रममा स्थानियहरूले यादवलाई स्वागत गर्दै मिठाइ समेत खुवाएका थिए।
कार्यक्रममा पार्टीका केन्द्रीय सदस्य विजय सरावगी, समानुपातिक उम्मेदवार विजय सरावगी, बहुदरमाई नगरप्रमुख सिंहासन साह, नेता शिव पटेल, पुरन कुर्मी, वडा अध्यक्ष सुरेन्द्र यादव लगायत सयौँ नेता–कार्यकर्ताको उपस्थिति रहेको थियो। टोलीले नगरदाहाका विभिन्न टोलमा पुगेर मतदातासँग छलफल गर्दै जनताका समस्या, सुझाव र अपेक्षाहरू सुनेको थियो।
उम्मेदवार यादवले सडक, स्वास्थ्य, शिक्षा र कृषि क्षेत्रको विकासलाई प्राथमिकतामा राख्दै युवालाई रोजगारीका अवसर सिर्जना गर्ने प्रतिबद्धता व्यक्त गरेकी छिन्। केन्द्रीय सदस्य सरावगीले पनि यादव सक्षम, इमानदार र जनतासँग नजिकको उम्मेदवार भएकाले उनलाई विजयी गराउन मतदातालाई आग्रह गरे।
कार्यक्रममा स्थानीय बासिन्दाले खानेपानी, सडक मर्मत, स्वास्थ्य सेवा विस्तार र बेरोजगारी समाधानजस्ता माग राखेका थिए। उम्मेदवार यादवले ती माग प्राथमिकताका साथ सम्बोधन गर्ने आश्वासन दिँदै आगामी दिनमा पनि घरदैलो कार्यक्रमलाई निरन्तरता दिने बताइन्।
