वीरगंज । यही फागुन २१ गते हुने प्रतिनिधिसभा सदस्य निर्वाचनअन्तर्गत पर्सा निर्वाचन क्षेत्र नं. १ मा व्यापारी पृष्ठभूमिका उम्मेदवार र राजनीतिककर्मीबीच मुख्य प्रतिस्पर्धा देखिएको छ । नेपाल कम्युनिष्ट पार्टी (एमाले) का उम्मेदवार प्रदीप यादव र नेपाली कांग्रेस का उम्मेदवार अनिल रुंगटा बीच कडा भिडन्त हुने आकलन गरिएको छ।
एमाले उम्मेदवार यादव पूर्व मन्त्री तथा निर्वतमान सांसद हुन् । मधेस आन्दोलनबाट उदाएका यादव पछिल्लो समय जसपा परित्याग गरी एमालेबाट चुनावी मैदानमा उत्रिएका हुन् । पार्टी परिवर्तनसँगै मधेसका मुद्दा छाडेको आरोप उनीमाथि लाग्दै आएको छ । यादवले मन्त्री र सांसद हुँदा गरेका कामका आधारमा मत माग्दै आफू सधैं जनताको सुख–दुःखमा साथमा रहेको दाबी गर्दै आएका छन् ।
कांग्रेस उम्मेदवार रुंगटा उद्योगी तथा व्यवसायी हुन् । उनी समानुपातिक कोटाबाट संविधानसभा सदस्य भइसकेका व्यक्ति हुन् । रुंगटामाथि संविधानसभा सदस्य हुँदा उल्लेख्य काम नगरेको तथा चुनावको समयमा मात्र सक्रिय हुने गरेको आरोप लाग्दै आएको छ । साथै, उनले सञ्चालन गरेको उद्योगले सिर्सिया नदी प्रदूषित बनाएको र नेपाली कामदारभन्दा भारतीय कामदार बढी राखेको भन्दै स्थानीयस्तरमा असन्तोष व्यक्त हुँदै आएको छ । रुंगटाले भने परिवर्तन र विकासको एजेन्डासहित मत माग्दै निर्वतमान सांसदले क्षेत्रको विकास नगरेको आरोप लगाएका छन् ।
यस क्षेत्रमा अन्य दलका उम्मेदवारहरू पनि प्रतिस्पर्धामा छन् । राष्ट्रिय स्वतन्त्र पार्टी (रास्वपा)बाट हरि पन्त, नेपाल कम्युनिष्ट पार्टीबाट अजय चौरसिया, जनता समाजवादी पार्टी (जसपा) नेपालबाट रामनरेश यादव, जनमत पार्टीबाट ओमप्रकाश सर्राफ, उज्यालो नेपाल पार्टीबाट रामकिशोर सिंह (पराग), तथा राष्ट्रिय प्रजातन्त्र पार्टीबाट नन्दु श्रीवास्तव लगायत उम्मेदवार चुनावी मैदानमा छन्।
रास्वपा उम्मेदवार पन्त पनि पेशाले होटल व्यवसायी हुन् र राजनीतिमा नयाँ अनुहारका रूपमा देखिएका छन् । नेकपा उम्मेदवार चौरसिया पेशाले सिए हुन्, उनी पनि नयाँ अनुहारकै रूपमा प्रतिस्पर्धामा रहेका छन् । यसाका साथै उज्यालाे नेपाल पार्टीका उम्मेदवार पराग वडाध्यक्षबाट राजीनामा दिएर प्रतिनिधि सभा सदस्यकाे चुनाव लडेका हुन् ।
क्षेत्र नं. १ मा मुख्यत: यादव र रुंगटाबीच प्रतिस्पर्धा केन्द्रित हुने राजनीतिक विश्लेषण गरिएको छ। यसका अलवा रास्वपाले बालेनलाई प्रधानमन्त्रीकाे उम्मेदवारकाे रुपमा अगाडी सारेका कारण रास्वपा प्रति पनि देशभर जस्तै पर्सा १ मा पनि आक्रषण देखिएकाे छ ।
