वीरगंज । राष्ट्रिय स्वतन्त्र पार्टी (रास्वपा) बाट पर्सा निर्वाचन क्षेत्र नम्बर २ का प्रतिनिधिसभा सदस्य पदका उम्मेदवार सुशील कुमार कानु ले आज पर्सागढी नगरपालिका–३ बढनिहारमा घरदैलो कार्यक्रम गरेका छन्।
घरदैलोका क्रममा उम्मेदवार कानुले मतदाताहरूसँग भेटघाट गर्दै घण्टी चुनाव चिन्हमा मतदान गर्न आग्रह गरे। उनले बढनिहारसहित आसपासका क्षेत्रमा अस्पतालको अभाव, खेलकुद पूर्वाधारको कमी तथा कृषकहरूले भोग्दै आएको मल र सिँचाइ पानीको समस्या समाधानका लागि पहल गर्ने प्रतिबद्धता व्यक्त गरे।
“कृषि यहाँको मुख्य आधार हो। किसानले समयमै मल र पानी नपाए समृद्धि सम्भव हुँदैन,” कानुले भने, “निर्वाचित भएपछि यी विषयलाई पहिलो प्राथमिकतामा राखेर समाधान गर्नेछु।”
युवालाई लक्षित कार्यक्रमअन्तर्गत स्थानीय स्तरमै पशुपालनसम्बन्धी प्राविधिक सीप तालिम सञ्चालन गर्ने, स्वरोजगार र रोजगारीका अवसर सिर्जना गर्ने योजना पनि उनले सार्वजनिक गरे। यसबाट वैदेशिक रोजगारीमा जान बाध्य युवालाई आफ्नै गाउँ–ठाउँमै भविष्य निर्माण गर्न सहयोग पुग्ने उनको विश्वास छ।
त्यसैगरी, प्रभावकारी अस्पताल व्यवस्थापन, आधारभूत स्वास्थ्य सेवामा सहज पहुँच र शिक्षाको गुणस्तर सुधार रास्वपाको प्रमुख एजेन्डा रहेको कानुले बताए। “जनताको आधारभूत आवश्यकता पूरा नगरी विकासको कुरा गर्नु अर्थहीन हुन्छ,” उनले उल्लेख गरे।
घरदैलोका क्रममा बढनिहारका ज्येष्ठ नागरिकहरूले उम्मेदवार कानुलाई समर्थन जनाउँदै परिवर्तनका पक्षमा नाराबाजी गरेका थिए। बुद्धिजीवी, युवा, महिला तथा कृषक समुदायले पनि यसपालिको मतले समाजमा सकारात्मक परिवर्तन ल्याउने विश्वास व्यक्त गरेका छन्।
घरदैलो कार्यक्रमले बढनिहार क्षेत्रमा रास्वपाप्रति बढ्दो आकर्षण र चुनावी सक्रियता थप सशक्त बन्दै गएको संकेत गरेको छ।
