वीरगंज । पर्सा क्षेत्र नम्बर ३ का नेकपा एमालेका उम्मेदवार रुपेश कुमार पाण्डेले आफू राजनीति लोकप्रिय हुनका लागि नभई काम गर्नका लागि आएको बताएका छन्।
मतदातासँगको भेटघाट तथा संवादका क्रममा उनले आफ्नो व्यक्तिगत एजेन्डा स्पष्ट रहेको उल्लेख गर्दै विकास र सुधारका प्राथमिकताहरू सार्वजनिक गरेका हुन्।
पाण्डेले किसान र कृषि क्षेत्रको रूपान्तरणलाई पहिलो प्राथमिकतामा राख्दै साना किसानको उत्पादनको उचित मूल्य सुनिश्चित गर्ने, मलखाद र सिँचाइको सहज व्यवस्था मिलाउने तथा बजार व्यवस्थापन सुधार गर्ने प्रतिबद्धता जनाए।
त्यसैगरी, शिक्षा र स्वास्थ्यको आधुनिकीकरणमा जोड दिँदै उनले शिक्षामा प्रविधि र सीपमूलक कार्यक्रममार्फत गुणस्तर वृद्धि गर्ने तथा स्वास्थ्य चौकीहरूको स्तरोन्नति गरी गुणस्तरीय सेवा विस्तार गर्ने योजना रहेको बताए।
युवालाई नेपालमै सम्मानजनक रोजगारी र सीपको अवसर सिर्जना गर्ने, महिलाको वास्तविक नेतृत्व र निर्णय प्रक्रियामा सहभागिता बढाउने तथा जेष्ठ नागरिकका लागि समुदाय–आधारित सहयोग र सम्मान सुनिश्चित गर्ने विषय पनि आफ्नो एजेन्डामा रहेको उनले प्रस्ट पारे।
सांसद निर्वाचित भए नियमित जन–प्रतिवेदन प्रस्तुत गर्दै प्रत्यक्ष जवाफदेहिता कायम गर्ने प्रतिबद्धता व्यक्त गर्दै पाण्डेले भने, “म नारा होइन, संरचना बनाउन चाहन्छु। म भीड होइन, भविष्यसँग उभिन चाहन्छु। यदि राजनीति सेवा हो भने, म त्यसलाई अभ्यासमा देखाउन चाहन्छु।”
