वीरगंज । पर्साको सखुवा प्रसौनी गाउँपालिका वडा नम्बर–१ सिधपुर अकवनियामा नेकपा एमालेको कार्यकर्ता भेला सम्पन्न भएको छ। भेलालाई सम्बोधन गर्दै पर्सा निर्वाचन क्षेत्र नम्बर–३ का उम्मेदवार रुपेश कुमार पाण्डेयले आफू निर्वाचित भए जनताको जीवनस्तर उकास्ने काम गर्ने प्रतिबद्धता व्यक्त गरेका छन्।
उम्मेदवार पाण्डेयले “ठूला–ठूला भाषणभन्दा काममा विश्वास गर्ने” बताउँदै कृषि, स्वास्थ्य, शिक्षा र रोजगारीका क्षेत्रमा देखिएका समस्यालाई प्राथमिकताका साथ समाधान गर्ने धारणा राखे। उनले आगामी दिनमा विकास, रोजगारी, शिक्षा, स्वास्थ्य र कृषि क्षेत्रको समग्र सुधारका लागि एमालेको जित आवश्यक रहेको उल्लेख गरे।
“स्थानीय तहदेखि केन्द्रसम्म विकासको गति बढाउन नेकपा एमालेको नेतृत्व अपरिहार्य छ,” उनले भने, “त्यसैले आगामी निर्वाचनमा एमालेको पक्षमा मतदान गर्न आग्रह गर्दछु।”
कार्यक्रममा पूर्व मन्त्री तथा एमाले नेता प्रमोद जैसवाल, सखुवा प्रसौनी गाउँपालिकाका पूर्व अध्यक्ष प्रदिप जसवाललगायत स्थानीय बासिन्दाको उल्लेख्य उपस्थिति रहेको थियो। स्थानीयले उम्मेदवार पाण्डेयलाई स्वागत गर्दै क्षेत्र विकासप्रति सकारात्मक अपेक्षा व्यक्त गरेका छन्।
उम्मेदवार पाण्डेयले चुनावी अभियानलाई थप तीव्र बनाउँदै जनताको घरदैलोमा पुग्ने प्रतिबद्धता पनि जनाएका छन्।
