वीरगंज । पर्सा निर्वाचन क्षेत्र नं. २ अन्तर्गत जनता समाजवादी पार्टी (जसपा) नेपालका प्रतिनिधिसभा सदस्य उम्मेदवार अशोक टेमानीले आगामी निर्वाचनको तयारीलाई थप तीव्र बनाएका छन्। टेमानीले बिहीबार वीरगंज महानगरपालिका वडा नं. २६ सुगौलीवीर्ता लगायत विभिन्न क्षेत्रमा भव्य घरदैलो अभियान सञ्चालन गर्दै मतदातासँग प्रत्यक्ष भेटघाट र संवाद गरेका हुन्।
घरदैलो कार्यक्रमका क्रममा टेमानीले शिक्षा, स्वास्थ्य, रोजगारी, खानेपानी, सडक तथा आधारभूत सेवासम्बन्धी स्थानीय समस्याहरू नजिकबाट सुने। मतदाताका सुझाव र अपेक्षालाई गम्भीर रूपमा लिँदै उनले निर्वाचित भएमा ती विषयहरूलाई संसदमा प्राथमिकताका साथ उठाउने प्रतिबद्धता जनाए।
“म नेता होइन, जनताको सेवक भएर काम गर्ने लक्ष्यमा छु। विगतको राजनीतिक अभ्यासभन्दा फरक, जवाफदेही र परिणाममुखी राजनीति आजको आवश्यकता हो,” टेमानीले बताए।
वडा नं. २६ का मतदातासँगको संवादमा उनले मधेश र पर्साको दीर्घकालीन विकास योजनाको आवश्यकता औँल्याउँदै वीरगंजलाई आर्थिक तथा औद्योगिक केन्द्रका रूपमा स्थापित गर्न संघीय सरकारमा बलियो प्रतिनिधित्व अपरिहार्य रहेको धारणा राखे।
“जनताको पीडा बुझ्ने, जनतासँगै हिँड्ने र जनताकै आवाज संसदमा पुर्याउने प्रतिनिधि आजको आवश्यकता हो,” उनले थपे।
घरदैलो अभियानमा सहभागी स्थानीय मतदाताले टेमानीको सरल स्वभाव, सहज पहुँच र सक्रिय नेतृत्वको प्रशंसा गरेका छन्। विगत केही समयदेखि निरन्तर क्षेत्रमै सक्रिय रहँदै आएका टेमानी जनताको विश्वास जित्ने क्रममा रहेको उनीहरूको भनाइ छ। यसले आगामी निर्वाचनमा टेमानीलाई व्यापक जनसमर्थन प्राप्त हुने अपेक्षा गरिएको छ।
जसपा नेपालले पर्सा–२ लाई रणनीतिक रूपमा महत्वपूर्ण क्षेत्रका रूपमा लिँदै चुनावी गतिविधि सशक्त बनाएको छ। त्यसैअनुसार उम्मेदवार टेमानीले घरदैलो, टोलसभा र प्रत्यक्ष संवादमार्फत अभियानलाई प्रभावकारी बनाइरहेका छन्। उनको अभियानमा युवादेखि वृद्धवृद्धासम्मको उल्लेखनीय सहभागिता देखिएको छ।
उम्मेदवार टेमानी मधेश प्रदेशका सफल उद्योगी–व्यवसायीका रूपमा परिचित छन्। उद्योग वाणिज्य महासंघ मधेश प्रदेशको नेतृत्व गरिसकेका उनी विभिन्न संघ–संस्थामा अध्यक्षका रूपमा काम गरिसकेका अनुभवी व्यक्तित्व हुन्। विगतदेखि सामाजिक सेवामा सक्रिय टेमानीले नीतिगत तहमा पुगेर क्षेत्रीय समस्याको दीर्घकालीन समाधान गर्ने उद्देश्यसहित प्रतिनिधिसभा सदस्यको उम्मेदवारी दिएका हुन्।
घरदैलो, टोलसभा र प्रत्यक्ष संवादमार्फत मतदातासँग जोडिँदै आएका अशोक टेमानीले पर्सा–२ मा जसपा नेपालको बलियो उपस्थिति र विकासमुखी सन्देश फैलाइरहेका छन्। उनको अभियानले मतदातामा विकास, सेवा र जवाफदेहिताप्रतिको आशा थप बलियो बनाएको देखिन्छ।
