वीरगंज । प्रतिनिधिसभा सदस्य निर्वाचन नजिकिँदै जाँदा पर्सा निर्वाचन क्षेत्र नम्बर–३ मा नेकपा एमालेले आफ्नो संगठनात्मक गतिविधि तीव्र बनाएको छ । फागुन २१ गते हुने निर्वाचनलाई लक्षित गर्दै एमालेले आउँदो शनिबार पटेर्वा सुगौली गाउँपालिकास्थित श्री बनसपति गाद्दीमाई मन्दिर परिसरमा बृहत कार्यकर्ता भेटघाट कार्यक्रम आयोजना गर्न लागेको हो।
कार्यक्रममा नेकपा एमाले केन्द्रीय कमिटीका उपमहासचिव तथा पूर्वमन्त्री योगेश भट्टराई प्रमुख अतिथिका रूपमा सहभागी हुनेछन्। भट्टराई एमाले पर्सा क्षेत्र नम्बर–३ का प्रतिनिधिसभा सदस्य उम्मेदवार रुपेश पाण्डेको निर्वाचन प्रचार–प्रसारणलाई सशक्त बनाउन पर्सा आउन लागेको जनाइएको छ।
आयोजकहरूले उक्त कार्यक्रमलाई पर्सा–३ मा एमालेको निर्वाचन अभियानको टर्निङ प्वाइन्टका रूपमा लिएको बताएका छन्। कार्यक्रममार्फत संगठन सुदृढीकरण, कार्यकर्ताबीच आपसी समन्वय र एकता मजबुत बनाउने तथा निर्वाचन अभियानलाई थप प्रभावकारी बनाउने उद्देश्य राखिएको छ।
कार्यक्रममा घरदैलो अभियानलाई अझ आक्रामक बनाउने, विपक्षी पक्षले फैलाएको भ्रम चिर्ने रणनीतिबारे समेत गहन छलफल हुने आयोजकहरूले जानकारी दिएका छन्।
कार्यक्रमलाई सम्बोधन गर्दै उपमहासचिव भट्टराईले मुलुकको स्थायित्व, विकास र समृद्धिका लागि एमालेको जित अपरिहार्य रहेको सन्देश दिने र पर्सा–३ लाई पार्टीको बलियो आधार क्षेत्रका रूपमा स्थापित गर्न कार्यकर्तालाई स्पष्ट कार्यदिशा तथा चुनावी रणनीति दिने तयारी रहेको छ।
कार्यक्रममा केन्द्र, प्रदेश, जिल्ला तथा स्थानीय तहका नेता–कार्यकर्ता, जनप्रतिनिधि र संगठनका प्रतिनिधिहरूको उल्लेखनीय सहभागिता रहने अपेक्षा गरिएको छ । एमाले नेताहरूले सामूहिक उपस्थिति र कार्यकर्ताको उत्साहले पर्सा–३ मा चुनावी माहोल थप तातिने विश्वास व्यक्त गरेका छन्।
कार्यक्रमलाई आगामी निर्वाचनका लागि नेकपा एमालेको शक्ति प्रदर्शन र एकताबद्ध संघर्षको घोषणाका रूपमा हेरिएको छ।
