वीरगंज । नेक्स्ट जेनेरेसन ईभेन्ट प्रा.लि.को आयोजनामा गायन रियालिटी शो “वीरगंज आईडल” आयोजना हुने भएको छ। उक्त कार्यक्रम माई टेलिभिजनबाट प्रशारण गरिने आयोजकले बताएका छन्।
यसअघि वीरगञ्ज स्कुल आईडलका दुई सिजन सफलतापूर्वक सम्पन्न गरेको अनुभवका आधारमा यसपटक खुला प्रतिस्पर्धाका रूपमा वीरगञ्ज आईडल आयोजना गर्न लागिएको हो। कार्यक्रमको मुख्य उद्देश्य वीरगञ्ज र आसपासका क्षेत्रका लुकेका गायन प्रतिभालाई राष्ट्रिय स्तरसम्म पुर्याउने अवसर प्रदान गर्नु रहेको आयोजकको भनाइ छ।
वीरगञ्ज आईडलमा १५ वर्ष र सो भन्दा माथिका उमेर समूहका इच्छुक प्रतिभाले सहभागिता जनाउन सक्नेछन्। प्रतियोगिता अडिसन, गाला राउण्ड र फाइनल चरणमार्फत सञ्चालन हुनेछ। अडिसनदेखि फाइनलसम्मका सबै कार्यक्रम वीरगञ्जको आदर्शनगरस्थित त्रिशला रेस्टुरेन्टमा आयोजना गरिनेछ। अडिसन फागुन २ गते आयोजना हुनेछ।
कार्यक्रमका संयोजक सद्धाम हुसैनले पत्रकार सम्मेलनमा स्वागत मन्तव्य दिँदै वीरगञ्ज आईडलले स्थानीय गायन प्रतिभालाई प्लेटफर्म दिने र उनीहरूलाई आत्मविश्वासका साथ अघि बढ्न प्रेरणा दिने उद्देश्य रहेको बताए।
निर्णायक हरिरत्न तुलाधरले प्रतियोगिताले यहाँका कलाकार र गायन प्रतिभालाई पहिचान र अवसर प्रदान गर्ने विश्वास व्यक्त गरे। अर्का निर्णायक प्रभात यादवले यस्ता कार्यक्रमले युवामा सिर्जनशीलता बढाउने र स्थानीय स्तरमै लुकेका प्रतिभा उजागर गर्न सहयोग पुग्ने बताए।
कार्यक्रमका प्रमुख अतिथि, पर्सा क्षेत्र नं. १ का प्रतिनिधि सभा उम्मेदवार रामकिशोर सिंह परागले कला र प्रतिभालाई अवसर र प्रोत्साहन दिन आवश्यक रहेको बताए। उनले कलाकार र खेलाडीलाई समाजका गहना भएको उल्लेख गर्दै यिनले स्थानको गरिमा र पहिचान उचाइमा पु¥याउने धारणा राखे। साथै, वीरगञ्जमा साहित्यिक तथा सांस्कृतिक गतिविधि चलायमान बनाउन सार्वजनिक भवन वा सभा हल निर्माण गर्ने प्रतिबद्धता व्यक्त गरे।
निर्णायक मण्डलमा हरिरत्न तुलाधर, अशोक प्रधान, सद्धाम हुसैन र प्रभात यादव रहेका छन् भने कार्यक्रमका प्रस्तोताका रूपमा सञ्चारकर्मी सूर्य शुभचिन्तक रहनेछन्। विजेतालाई नगद पुरस्कारसहित ट्रफी र प्रमाणपत्र प्रदान गरिनेछ। कभर म्युजिक भिडियोमा गाउने अवसरका साथै अन्य आकर्षक उपहारहरूको व्यवस्था पनि गरिएको छ।
कार्यक्रममा उपस्थित पत्रकारहरूले कार्यक्रमको स्वरूप, निष्पक्षता र भविष्यका योजनाबारे जिज्ञासा राखेका थिए। आयोजकले गायन क्षेत्रमा रुचि राख्ने सबै प्रतिभालाई सहभागिताका लागि आग्रह गरेका छन्।
