वीरगंज । पर्सा निर्वाचन क्षेत्र नम्बर–३ मा नेकपा (एमाले)बाट उम्मेदवारी दिएका रूपेश पाण्डे फरक शैली र आत्मविश्वासका साथ चुनावी मैदानमा उत्रिएकाे वताएका छन् । काठमाडौंमा स्थापित व्यवसाय छाडेर पछिल्ला करिब चार वर्षदेखि गाउँ–गाउँ घुम्दै आएका पाण्डे आफूलाई ‘नेता’भन्दा पनि जनताको सुख–दुःखको साथी र विकासको अगुवा पात्रका रूपमा प्रस्तुत गर्दै आएका छन्।
पाण्डेले व्यवसायमा सफलता पाए पनि आफ्नो जन्मभूमिको अवस्था देख्न नसकेर राजनीतिमा सक्रिय भएको बताउँछन्। उनले विगत करिब चार वर्षमा क्षेत्रका सबै वडामा पुगेर समस्या पहिचान गरिसकेको दाबी गर्दै अब समाधानका स्पष्ट योजनासहित चुनावी मैदानमा उत्रिएको बताएका छन्।
पर्सा–३ का मुख्य समस्यामध्ये कृषि उपजले बजार नपाउनु प्रमुख रहेको पाण्डेको भनाइ छ। किसानले उत्पादन गरेको तरकारी, दूध र अन्डाले उचित बजार नपाउँदा त्यसको असर युवा पलायनमा परेको उनको ठहर छ। यस समस्याको समाधानका लागि उनले क्षेत्रमा चारवटा कोल्ड स्टोर स्थापना गरी उत्पादनदेखि बजारसम्मको शृंखला व्यवस्थित गर्ने योजना अघि सारेका छन्।
शिक्षा र स्वास्थ्य क्षेत्रतर्फ संकेत गर्दै पाण्डेले पर्याप्त विद्यालय र स्वास्थ्य संस्था भए पनि सेवाको गुणस्तर कमजोर रहेको बताए। निर्वाचित भए सांसदका रूपमा नीतिगत भूमिकासँगै विद्यालय र स्वास्थ्य संस्थाको नियमित अनुगमन गर्ने प्रतिबद्धता उनले व्यक्त गरेका छन्।
खानेपानी, सडक र सिँचाइजस्ता पूर्वाधार निर्माणमा देखिएको ढिलाइ नेतृत्वको इच्छाशक्तिको अभावका कारण भएको उनको दाबी छ। पाण्डेले आफू विकास र परिणाममुखी राजनीतिका लागि उम्मेदवार बनेको भन्दै पर्सा–३ को समग्र रूपान्तरण आफ्नो मुख्य उद्देश्य रहेको बताएका छन्।
