वीरगंज । मधेश साहित्य महोत्सवको दोस्रो संस्करण यस वर्ष पनि वीरगंजमा आयोजना हुने भएको छ। यही माघ १५, १६ र १७ गते वीरगंजस्थित मधेश विश्वविद्यालय परिसरमा आयोजना हुन लागेको महोत्सवको तयारी अन्तिम चरणमा पुगेको आयोजक संस्था उत्कर्ष नेपालले जनाएको छ। मंगलबार आयोजित पत्रकार सम्मेलनमार्फत महोत्सवसम्बन्धी विस्तृत जानकारी सार्वजनिक गरिएको हो।
पत्रकार सम्मेलनमा बोल्दै उत्कर्ष नेपालका अध्यक्ष रितु राज पटेलले मधेश साहित्य महोत्सव केवल उत्सव मात्र नभई साझा सांस्कृतिक आन्दोलनका रूपमा स्थापित हुँदै गएको बताए । उनले पहिलो संस्करणले अभूतपूर्व सहभागिता, सकारात्मक ऊर्जा र सार्वजनिक स्वामित्व देखाएको उल्लेख गर्दै मधेश र समग्र नेपालका विविध भाषा, पहिचान र संस्कृतिलाई जोड्ने मञ्चका रूपमा महोत्सव विकसित हुँदै गएको धारणा राखे।
“पहिलो संस्करणको सफलताले हामीलाई स्पष्ट सन्देश दियो—मधेश साहित्य महोत्सव केवल कार्यक्रम होइन, यो आवश्यकता थियो,” उनले भने, “त्यही विश्वासका साथ दोस्रो संस्करण (एमएलएफ २०२६) लाई अझ गहिरो, समावेशी र समुदाय–आधारित बनाउँदै अघि बढिरहेका छौं।”
मधेश विश्वविद्यालयका उपकुलपति डा. दिपक शाक्यले विविध चुनौती र विषम परिस्थितिका बाबजुद पनि वीरगंज साहित्य र संस्कृतिको उत्सव मनाउन तयार रहेको बताए । उनले वीरगंज बिस्तारै मधेश र समग्र नेपाललाई जोड्ने ‘कनेक्टिङ पोइन्ट’ बन्दै गएको उल्लेख गर्दै देशभरिका स्रष्टा, कलाकार, चिन्तक र युवाहरूको साझा भेटस्थलका रूपमा विकसित हुँदै गएको धारणा व्यक्त गरे ।
आयोजक संस्थाका जय साहले यस संस्करणमा विद्यालय–कलेजका विद्यार्थी, युवा, महिला, दलित तथा सीमान्तकृत समुदाय, नागरिक समाज र स्थानीय संस्थाहरूलाई केन्द्रमा राखिएको जानकारी दिए । उनका अनुसार महोत्सवपूर्व आयोजना हुने ‘एमएलएफ ट्यालेन्ट हन्ट’ मार्फत नयाँ पुस्ताका सिर्जनशील आवाजलाई सार्वजनिक मञ्च प्रदान गरिनेछ।
महोत्सव सफल बनाउन वीरगंज महानगरपालिका, मधेश विश्वविद्यालय, मधेश प्रदेश सरकारसहित निजी तथा गैर–निजी संघसंस्था र नागरिक समाजको महत्वपूर्ण सहयोग रहने आयोजकको भनाइ छ। उत्कर्ष नेपालले सम्पूर्ण सञ्चारमाध्यम, साहित्यप्रेमी, युवा, कलाकार तथा नागरिक समाजलाई महोत्सवमा सहभागी भई मधेशको कथा, स्वर र सपनालाई एकै मञ्चमा जोड्न आग्रह गरेको छ।
आयोजक संस्थाकी सलमा खातुनका अनुसार महोत्सवको उद्घाटन मधेश प्रदेशका मुख्यमन्त्री कृष्ण प्रसाद यादवले गर्ने कार्यक्रम तय भएको छ । उद्घाटन सत्र महोत्सवका संरक्षक तथा वीरगंज महानगरपालिकाका प्रमुख राजेशमान सिंहको अध्यक्षतामा सम्पन्न हुनेछ ।
महोत्सवका सल्लाहकार गणेश लाठका अनुसार कार्यक्रम ‘बीज पत्र–गाउँ: स्मृति, मिथक र यथार्थ’ विषयक सत्रबाट डा. भास्कर गौतमद्वारा सुरुवात गरिने छ । तीन दिनसम्म सञ्चालन हुने महोत्सवमा १६ सत्र रहनेछन्, जहाँ यस वर्ष विशेष रूपमा गाउँघरका समस्या र स्थानीय कलाकारलाई प्राथमिकता दिइएको छ।
महोत्सवको मुख्य आकर्षणका रूपमा यस वर्ष विशेष सांगीतिक साँझ आयोजना गरिनेछ, जसमा भारतकी प्रख्यात भोजपुरी गायिका कल्पना पटवारीसहित स्थानीय कलाकारहरूको प्रस्तुति रहनेछ। दर्शकको सम्भावित भीडलाई ध्यानमा राख्दै उक्त सांस्कृतिक साँझ वीरगंजको आदर्शनगरस्थित पुरानो बसपार्कमा आयोजना गरिने आयोजकले जनाएको छ।
आयाेजक संस्थाका अध्यक्ष रितु राज पटेलकाे अध्यक्षतामा मधेश विश्वविद्यालयको सभाहलमा सम्पन्न पत्रकार सम्मेलनमा नेपाल पत्रकार महासंघ पर्साका अध्यक्ष गणेश लाठ, भोजपुरी प्रतिष्ठानका श्याम सर्राफलगायत विभिन्न सञ्चारमाध्यममा आबद्ध पत्रकारहरूको उपस्थिति रहेको थियो।
