वीरगंज । पर्सा निर्वाचन क्षेत्र नं. २ मा १५ जना स्वतन्त्र उम्मेदवारसहित विभिन्न राजनीतिक दलबाट कुल ३२ जनाले उम्मेदवारी दर्ता गराएका छन्। आगामी फागुन २१ गते हुने प्रतिनिधि सभा निर्वाचनका लागि ३२ जनाले मनोनयन दर्ता गराएको निर्वाचन कार्यालयले जनाएको छ।
निर्वाचन कार्यालयका अनुसार नेपाली कांग्रेसबाट पूर्व मन्त्री एवं निवर्तमान प्रतिनिधि सभा सदस्य अजय कुमार चौरसिया, नेकपा एमालेबाट रिमा कुमार यादव, नेपाली कम्युनिष्ट पार्टीबाट मनोज चौधरी, राष्ट्रिय स्वतन्त्र पार्टीबाट शुशिल साह कानु उम्मेदवार छन्।
त्यस्तै राष्ट्रिय प्रजातन्त्र पार्टीबाट विना जयसवाल कुर्मी, जनता समाजवादी पार्टीबाट अशोक कुमार अग्रवाल, आम जनता पार्टीबाट रन्जु कुमारी साह, प्रगतिशील लोकतान्त्रिक पार्टीबाट अमिताभ बचन दास, उज्यालो नेपाल पार्टीबाट कृष्ण मुरारी प्रजापतिले उम्मेदवारी दिएका छन् । स्वतन्त्रतर्फ राजेश्वर प्रसाद साह लगायत उम्मेदवार मैदानमा छन्।
स्वतन्त्र उम्मेदवारी दिएका राजेश्वर प्रसाद साह पूर्व प्रदेश सभा सदस्य हुन्। उनले यसअघि नेपाली कांग्रेसबाट प्रतिनिधि सभा सदस्यको उम्मेदवार बन्ने चाहना राखेका थिए। तर पार्टीबाट टिकट नपाएपछि उनले स्वतन्त्र रूपमा उम्मेदवारी दर्ता गराएको जनाइएको छ।
