वीरगंज । पर्सा निर्वाचन क्षेत्र नम्बर १ मा आगामी फागुन २१ गते हुने प्रतिनिधि सभा सदस्य निर्वाचनका लागि १२ जना स्वतन्त्रसहित विभिन्न दलबाट कुल ३० जनाले उम्मेदवारी दर्ता गराएका छन् । क्षेत्र नम्बर १ को निर्वाचन कार्यालयका अनुसार सोमबार विहान १० बजेदेखि सांझ ५ बजेसम्म उम्मेदवारी दर्ता प्रक्रिया सम्पन्न भएको हो ।
निर्वाचन कार्यालयले उपलब्ध गराएको विवरणअनुसार नेकपा एमालेबाट पूर्व मन्त्री एवं निर्वतमान प्रतिनिधि सभा सदस्य प्रदीप यादव, नेपाली कांग्रेसबाट अनिल कुमार रुंगटा, राष्ट्रिय स्वतन्त्र पार्टीबाट बुद्धि प्रसाद पन्त (हरि पन्त), नेपाली कम्युनिष्ट पार्टीबाट अजय चौरसिया, जनता समाजवादी पार्टीबाट रामनरेश प्रसाद यादव, जनमत पार्टीबाट ओमप्रकाश सर्राफ उम्मेदवार बनेका छन् ।
त्यस्तै, उज्यालो नेपाल पार्टीबाट राम किशोर सिंह (पराग), आम जनता पार्टीबाट विश्वराज पटेल, श्रम संस्कृति पार्टीबाट वसिम शेष र राप्रपाबाट नन्द किशोर श्रीवास्तवले पनि उम्मेदवारी दर्ता गराएका छन् ।
अन्य दलतर्फ मजदुर किसान पार्टीबाट प्रमोद कुमार पटेल, पिपुल फर्स्ट पार्टीबाट जावेद इकबाल हैदर, नेपाल लोकतान्त्रिक पार्टीबाट शालिक राम प्रसाद कानु, एकल चुनाव चिन्ह बसबाट सोरुब अन्सारी, नेकपा संयुक्तबाट शंकर कुमार कर्ण र जन अधिकार पार्टीबाट महेश कुमार पासवान उम्मेदवार रहेका छन् ।
यस्तै स्वतन्त्र उम्मेदवारी दर्ता गराउनेमा शिव प्रसाद कोइरी, अभिनास चौरसिया, विशाल कुमार, प्रेम मेहता, अनिल प्रसाद यादव, नरेश कुमार यादव, दिप कुमार शर्मा र सरोज प्रसाद यादव रहेका छन् ।
पर्सा–१ मा दल र स्वतन्त्र दुवै तर्फका उम्मेदवारको संख्या धेरै भएकाले यस क्षेत्रको प्रतिस्पर्धा रोचक हुने अनुमान गरिएको छ ।
