वीरगंज । पर्सा क्षेत्र नं. ३ बाट प्रतिनिधि सभा सदस्यका प्रत्यासी रूपेश पाण्डेले आफू नेकपा एमाले प्रवेश नगरेको स्पष्ट पारेका छन्। शनिबार एमाले अध्यक्ष केपी शर्मा ओलीसँग वर्तमान राजनीतिक घटनाक्रमबारे छलफल गर्न एमालेका जिल्ला नेताहरूसँगै पुगेको स्वीकार्दै उनले त्यस क्रममा सामान्य स्वागतस्वरूप खादा ओढाइएको मात्र बताए।
पाण्डेले सामाजिक सञ्जाल फेसबुकमा लेख्दै भनेका छन्, “पाहुनालाई स्वागत गर्ने वा खादा ओढाएर सम्मान गर्ने परम्परा नै हो। मैले त्यसलाई सामान्य रूपमा लिएको थिएँ। तर त्यसपछि पार्टी नै प्रवेश गरेको भनेर प्रचार भएपछि मात्र थाहा पाएँ। यो सरासर गलत हो।” उनले आफू अहिलेसम्म कुनै पनि पार्टीमा आवद्ध नरहेको र एमालेमा प्रवेश नगरेको स्पष्ट खण्डन गरेका छन्।
हिजो भएको दुष्प्रचारप्रति दुःख व्यक्त गर्दै पाण्डेले पर्सा–३ मा विनास्वार्थ समाजसेवामा निरन्तर लाग्दै आएको र क्षेत्रको विकासलाई अगाडि बढाउने योजनासहित सक्रिय रहेको सबैलाई अवगत रहेको उल्लेख गरेका छन्। “परिस्थितिलाई बुझिदिनुहुन सबैमा सविनम्र अनुरोध गर्दछु,” उनले भनेका छन्।
यसैबीच, एमालेका केन्द्रीय सदस्य प्रभु हाजराले पनि उक्त घटनाबारे स्पष्टिकरण दिँदै नेकपा एमालेका श्रद्धेय अध्यक्ष केपी शर्मा ओली र युवा उद्यमी रूपेश कुमार पाण्डेबिच भेटघाट मात्र भएको बताएका छन् । भेटका क्रममा खादा लगाएर सम्मान गरिएको हो, पार्टी प्रवेश नगराइएको भन्दै भ्रममा नपर्न आग्रह गरेका छन्।
