वीरगंज । हिन्दु स्वयंसेवक संघ नेपालले समाजमा समता, ममता र समरसताको सन्देश फैलाउने उद्देश्यका साथ आयोजना गरेको ‘समरसता उत्सव’ पर्सा जिल्लाको ऐतिहासिक गहवामाई मन्दिर परिसर, वीरगंजमा माघे संक्रान्तिको शुभ अवसरमा भव्य रूपमा सम्पन्न भएको छ।
कार्यक्रमको शुभारम्भ विश्व हिन्दु परिषद नेपालका विशिष्ट व्यक्तित्वहरूले दीप प्रज्वलन गरी गरेका थिए। ‘संगठित हिन्दु, समर्थ नेपाल’ भन्ने मूल नाराका साथ आयोजित उक्त उत्सवमा समाजका विभिन्न वर्ग, समुदाय र क्षेत्रका नागरिकहरूको उल्लेखनीय तथा समान सहभागिता रहेको विश्व हिन्दु परिषद नेपाल पर्साका सचिव दिपेन्द्र सर्फले जानकारी दिए।
आयोजकका अनुसार धार्मिक, सांस्कृतिक तथा सामाजिक एकताको प्रवर्द्धन गर्दै आपसी भाइचारा, सद्भाव र समभावलाई थप सुदृढ बनाउने उद्देश्यले कार्यक्रम आयोजना गरिएको हो।
समरसता उत्सवको अवसरमा महाप्रसाद (खिचडी) पर्व पनि आयोजना गरिएको थियो। सहभागीहरू सबैले एउटै स्थानमा बसेर सामूहिक रूपमा महाप्रसाद ग्रहण गर्दै आपसी आत्मीयता र समानताको अनुभूति व्यक्त गरेका थिए।
सबै वर्गका सहभागीहरूले सामूहिक महाप्रसाद ग्रहण गर्दा सामाजिक समानता र समभावको सन्देश प्रवाह भएको जनाउँदै यसले समाजमा विद्यमान विभेद, असमानता र दूरी कम गरी एकताको भावना मजबुत बनाउने विश्वास आयोजकहरूले व्यक्त गरेका छन्।
कार्यक्रममा विश्व हिन्दु परिषद नेपालका सदस्यहरूद्वारा परेड, धार्मिक अनुष्ठान, सांस्कृतिक झल्को तथा समरसताको सन्देशमूलक विविध गतिविधिहरू प्रस्तुत गरिएको थियो।
हिन्दु स्वयंसेवक संघ नेपालले यस्ता कार्यक्रममार्फत समरस, सशक्त र संगठित समाज निर्माणका लागि सम्पूर्ण धर्मावलम्बी, सामाजिक अभियन्ता, युवा तथा आम नागरिकलाई हातेमालो गर्न आह्वान गरेको छ।
