वीरगंज । स्वर्गीय गोपाल गिरी क्रियाशील पत्रकारिता पुरस्कार वीरगंज पत्रकार गोविन्द देवकोटालाई प्रदान गरिएको छ । बिहीबार नेपाल पत्रकार महासंघ पर्सा शाखाले स्व. गिरीको पुण्यतिथिको अवसरमा आयोजना गरेको कार्यक्रममा देवकोटालाई नगद ५१ हजार रुपैयाँसहित कदरपत्र प्रदान गरिएको हो ।
कार्यक्रममा मधेस प्रदेश सरकारका भूमि व्यवस्था, कृषि तथा सहकारी मन्त्री श्याम पटेलले पत्रकार देवकोटालाई ५१ हजार रुपैयाँको चेक र कदरपत्र हस्तान्तरण गरेका थिए ।
पत्रकार देवकोटा वीरगन्जबाट प्रशारण हुँदै आएको सामुदायिक रेडियो नारायणी एफएम र रेस खबरका कार्यकारी अध्यक्ष हुनुका साथै सामुदायिक रेडियो प्रशारक संघका केन्द्रीय वरिष्ठ उपाध्यक्षसमेत रहेका छन् ।
वीरगन्जका पूर्व मेयर तथा नेपाल पत्रकार महासंघ पर्सा शाखाका पूर्व अध्यक्षसमेत रहेका गोपाल गिरीको २०६० साल माघ १ गते तत्कालीन माओवादीद्वारा गोली हानी हत्या गरिएको थियो । स्व. गिरीको स्मृतिमा नेपाल पत्रकार महासंघ पर्सा शाखाले उक्त क्रियाशील पत्रकारिता पुरस्कार स्थापना गरेको हो ।
यसअघि उक्त पुरस्कारबाट पत्रकारहरू बृजलाल पासवान, गया यादव, कन्हैयालाल केसरी, ओमप्रकाश खनाल, श्याम बन्जारा, पंकज श्रेष्ठ, शत्रुघन नेपाल, ध्रुव साह लगायत पुरस्कृत भइसकेका छन् ।
नेपाल पत्रकार महासंघ पर्सा शाखाका अध्यक्ष ओमप्रकाश खनालको अध्यक्षतामा सम्पन्न पुरस्कार वितरण कार्यक्रममा महासंघका केन्द्रीय सचिव अशोक तिवारी, पूर्व केन्द्रीय सचिव दिपेन्द्र चौहान, पर्साका प्रमुख जिल्ला अधिकारी भोला दाहाललगायतको विशेष उपस्थिति रहेको थियो ।
