वीरगंज । प्रगतिशील लोकतान्त्रिक पार्टी (प्रलोपा) ले आगामी फागुन २१ गते हुने प्रतिनिधि सभा निर्वाचनका लागि पर्सा क्षेत्र नं. २ बाट युवा नेता अमिताभ बचन दासलाई उम्मेदवार घोषणा गरेको छ।
पर्साको बहुदरमाई नगरपालिका वडा नं. ४ बहुअरी पिडरीमा आयोजित पार्टीको एकता बैठकमार्फत दासलाई औपचारिक रूपमा उम्मेदवार बनाइएको हो । दास प्रलोपाका पर्सा जिल्ला इन्चार्ज तथा जिल्ला संयोजकसमेत हुन् ।
कार्यक्रममा पार्टीका केन्द्रीय सदस्य तथा श्रम, रोजगार तथा सामाजिक सुरक्षा विभाग प्रमुख बालकृष्ण श्रेष्ठले प्रलोेपाको मूल एजेन्डा रोजगारी र निःशुल्क स्वास्थ्य उपचार रहेको उल्लेख गर्दै “हरेक घरमा रोजगारी” पार्टीको स्पष्ट प्रतिबद्धता भएको बताए।
पर्सा क्षेत्र नं. २ की संयोजक तथा प्रदेश सदस्य रेणु वि.क.को अध्यक्षतामा सम्पन्न कार्यक्रममा पर्सा क्षेत्र नं. ४ का इन्चार्ज दिनेश यादव, क्षेत्र नं. ३ का संयोजक फनिन्द्र गुप्ता, केन्द्रीय सल्लाहकार प्रभुलाल श्रीवास्तव, प्रदेश सदस्यहरू अनिल चौरसिया र मनोज सोनार तथा महिला नेतृ जमिला खातुनलगायतको उल्लेखनीय सहभागिता रहेको थियो।
उम्मेदवार घोषणा सभालाई सम्बोधन गर्दै अमिताभ बचन दासले हालको राजनीतिमा इमानदार र त्यागी कार्यकर्ताभन्दा तस्करी र दलाली गर्नेहरूको वर्चस्व बढ्दै गएको टिप्पणी गरे। उनले जनताको समस्या केन्द्रमा राखेर राजनीति गर्ने प्रतिबद्धता जनाउँदै आगामी निर्वाचनमा पार्टीको चुनाव चिह्न ‘आँखा’ मा मतदान गर्न मतदातासँग आग्रह गरे। दास सामाजिक कार्यमा समेत निरन्तर सक्रिय रहँदै आएका युवा नेता हुन्।
बैठकले सन्तोष प्रसाद कलवारको संयोजकत्वमा १११ सदस्यीय निर्वाचन परिचालन समिति गठन गर्ने निर्णयसमेत गरेको छ। कार्यक्रमको सञ्चालन सुनिल रौनियारले गरेका थिए।
