वीरगंज । आगामी फागुनमा हुने प्रतिनिधि सभा निर्वाचन नजिकिँदै जाँदा पर्सा निर्वाचन क्षेत्र नम्बर–३ मा राजनीतिक सरगर्मी तीव्र बन्दै गएको छ। लामो समयदेखि दोहोरिँदै आएको परम्परागत राजनीतिबाट आजित मतदाता अहिले परिणाममुखी, जवाफदेही र जनमुखी नेतृत्वको खोजीमा देखिन थालेका छन् ।
यही परिवेशमा व्यावसायिक पृष्ठभूमिबाट समाजसेवामा सक्रिय रुपेश पाण्डेय पर्सा–३ मा आशा र अपेक्षाको केन्द्रका रूपमा उदाउँदै गएका छन्। “सानालाई माया, पूरानालाई सम्मान” भन्ने मान्यतामा आधारित राजनीतिक नीति र व्यवहारका कारण पाण्डेय दलगत सीमाभन्दा माथि उठेर लोकप्रिय बन्दै गएका छन्। स्थानीयका अनुसार उनले कसैलाई कमजोर वा प्रतिस्पर्धीका रूपमा नभई सबैलाई साझेदारका रूपमा व्यवहार गर्ने राजनीतिक संस्कारको अभ्यास गरिरहेका छन्, जसका कारण राजनीतिक दलका कार्यकर्ता, स्वतन्त्र सोच राख्ने नागरिक र तटस्थ मतदातामाझ उनको स्वीकार्यता बढ्दो छ।
राजनीतिक गालीगलौज, आरोप–प्रत्यारोप र व्यक्तिगत कटाक्षभन्दा टाढा रहेर विकास निर्माण र नीतिगत एजेन्डालाई केन्द्रमा राख्दै पाण्डेय मतदातासँग निरन्तर संवादमा छन्। उनले सार्वजनिक रूपमा अबको राजनीति भिडन्त होइन, समाधान खोज्ने प्रक्रिया हुनुपर्ने धारणा राख्दै आएका छन्। यही दृष्टिकोणका कारण उनी पर्सा–३ मा संयमित, परिपक्व र सकारात्मक राजनीतिक अनुहारका रूपमा चिनिन थालेका छन्।
स्थिर व्यवसायिक जीवनलाई थाती राखेर राजनीतिक यात्रामा होमिएका पाण्डेय समाजका लागि केही गर्नुपर्ने हुटहुटी र जनताको आवाज नीति तथा निर्णय तहसम्म पुर्याउने चाहनाले राजनीतिमा आएको बताउँछन्। व्यवसायमा रहँदा बनाएको विश्वसनीयता, व्यवस्थापन क्षमता र परिणाममुखी सोचलाई सार्वजनिक सेवामा प्रयोग गर्ने उनको प्रतिबद्धता रहेको छ।
“पार्टीभन्दा जनता ठूलो हुन्छ” भन्ने मान्यतालाई व्यवहारमा उतार्दै आएका पाण्डेय चिया पसलदेखि टोल–गल्ली, बजारदेखि गाउँबस्तीमा पुगेर नागरिकका समस्या सुन्ने, बुझ्ने र समाधान खोज्ने कार्यमा सक्रिय छन्। जनताको साथ र सहभागिताबिनाको परिवर्तन सम्भव छैन भन्ने उनको विश्वासले स्थानीयस्तरमा सकारात्मक सन्देश प्रवाह गरेको छ।
नयाँ पुस्तालाई राजनीतिमा अगाडि ल्याउनुपर्ने धारणा पाण्डेयको अर्को प्रमुख एजेन्डा हो।
जेन–जी आन्दोलनपछि उठेको युवा नेतृत्वको आवाजलाई व्यवहारिक रूप दिन उनी सक्रिय देखिन्छन्। पुराना अनुभव र नयाँ ऊर्जाबीच सन्तुलन कायम गर्दै नेतृत्वको रूपान्तरण आवश्यक रहेको उनको दृष्टिकोणले युवामाझ विशेष आकर्षण पैदा गरेको छ।
विकासका एजेन्डाअन्तर्गत पाण्डेयले पोखरिया, पकाहा, महुवन, चीपुरलगायत क्षेत्रका बजारलाई व्यवस्थित र आधुनिक बनाउने, कृषिमा प्रविधिकरण गर्ने, शिक्षा र स्वास्थ्य सेवामा नागरिकको सहज पहुँच विस्तार गर्ने योजना अघि सारेका छन्। साथै धार्मिक स्थलहरूको संरक्षण र प्रवर्द्धनमार्फत पर्यटन र रोजगारी सिर्जना गर्ने, राष्ट्रिय निकुञ्जसँग समन्वय गरी धार्मिक गन्तव्यलाई राष्ट्रियस्तरको आकर्षण बनाउने भिजनलाई स्थानीयले सकारात्मक रूपमा लिएका छन्।
पर्सा–३ अन्तर्गतका सात स्थानीय तह र ३५ वडालाई समेट्ने एकीकृत दीर्घकालीन विकास योजनामार्फत आर्थिक, सामाजिक र पूर्वाधार सुधार ल्याउने प्रतिबद्धता जनाउँदै पाण्डेयले अब नेतृत्वको मूल्यांकन पार्टीको झण्डा वा भाषणबाट होइन, जनताको जीवनमा ल्याएको परिवर्तनबाट हुनुपर्ने समय आएको बताएका छन्।
धर्म–संस्कृति संरक्षण, सामाजिक सद्भाव, सहकार्य र मेलमिलापलाई सुदृढ बनाउने दृष्टिकोणका कारण रुपेश पाण्डेयको छवि समुदायमा थप मजबुत बन्दै गएको छ। जनताको साथलाई नै आफ्नो सबैभन्दा ठूलो शक्ति मानेर अघि बढिरहेका पाण्डेय अहिले पर्सा–३ मा विकासको हुटहुटी बोकेका, सकारात्मक राजनीति अभ्यास गर्ने र नयाँ पुस्तालाई अघि सार्ने सम्भावित नेतृत्वका रूपमा स्थापित हुँदै गएका छन्।
