वीरगंज । आगामी माघ १५, १६ र १७ गते वीरगञ्जमा आयोजना हुने मधेश साहित्य महोत्सव २०२६ को दोस्रो संस्करणको तयारीका विषयमा सरोकारवाला निकाय तथा नागरिक समाजका प्रतिनिधिहरूबीच शनिबार छलफल सम्पन्न भएको छ।
उत्कर्ष नेपालका अध्यक्ष ऋतुराजको अध्यक्षतामा सम्पन्न छलफलमा महोत्सवको उद्देश्य, विषयवस्तु, सहभागिता तथा कार्यक्रम संरचनाबारे विस्तृत रूपमा विचार–विमर्श गरिएको थियो। उत्कर्ष नेपालको आयोजनामा हुन लागेको महोत्सवको तयारीबारे छलफल गरिएको हो ।
मधेश साहित्य महोत्सव आयोजक समूहकी सलमा खातुनले यस वर्षको महोत्सव ‘गाउँ मन्थन’ लाई मुख्य विषयवस्तुका रूपमा केन्द्रित गरिने जानकारी दिँदै मधेशका सबै क्षेत्र, समुदाय र वर्गको अर्थपूर्ण सहभागिता सुनिश्चित गरिने बताइन्। महोत्सवले ग्रामीण जीवन, संस्कृति र आवाजलाई प्राथमिकताका साथ उजागर गर्ने लक्ष्य राखेको उनको भनाइ थियो।
कार्यक्रमको उद्देश्यबारे प्रकाश पार्दै उत्कर्ष नेपालका जय साहले भाषा, साहित्य र संस्कृतिको संरक्षण तथा प्रवद्र्धनका लागि मधेश साहित्य महोत्सवको आवश्यकता औँल्याए। साहित्य, संस्कृति र सामाजिक संवादलाई सशक्त बनाउने उद्देश्यका साथ महोत्सव आयोजना गरिन लागेको उनले बताए।
छलफलमा नेपाल पत्रकार महासंघ पर्साका अध्यक्ष ओमप्रकाश खनाल, नेपाल भोजपुरी समाजका अध्यक्ष ध्रुवसिंह ठकुरी, प्रकृति सेवा प्रतिष्ठानका जसपाल सिंह, सामाजिक अभियन्ता प्रकाश थारु, लिडरसिप डेभलपमेन्ट इन्स्टिच्युटका प्रबन्ध निर्देशक अनिल जैयसवाल, मानव सेवा आश्रमका देवेश गुप्ता, नेपाल इनोभेटिभ सोसाइटीका अध्यक्ष कमल चौगाई, जेन–जी प्रतिनिधि विशेष साहलगायतले आ–आफ्ना सुझाव प्रस्तुत गरेका थिए।
सहभागीहरूले प्यानल छलफलका विषयवस्तु सहभागीहरूको रुचिअनुसार तय गर्नुपर्ने, वक्ताहरूलाई सबै क्षेत्र र समुदायबाट समावेशी बनाइनुपर्ने तथा मधेशका भाषा, साहित्य, संस्कृति र परम्परालाई प्राथमिकताका साथ समेटिनुपर्ने सुझाव दिएका थिए। साथै तराई–मधेशमा विवाहमा गाइने परम्परागत गीत, स्थानीय संस्कृति, खानाका परिकार तथा स्थानीय उत्पादनलाई स्टलमार्फत प्रस्तुत गर्ने विषयमा पनि छलफल भएको छ।
यसैगरी, महोत्सवमा प्रस्तुत गरिने रचनाका लागि माघ ३ गते ‘ट्यालेन्ट हन्ट’ कार्यक्रम आयोजना गरी छनोट भएका रचनालाई मात्रै मुख्य कार्यक्रममा समावेश गरिने जानकारी उत्कर्ष नेपालका जय साहले दिए।
