वीरगंज । साविक नेकपा माओवादी केन्द्रका वैकल्पिक केन्द्रीय सदस्य तथा मधेस प्रदेश सभा सदस्य रहबर अन्सारीले पार्टी परित्याग गरेका छन् ।
अन्सारीले बिहीबार हुलाकमार्फत पार्टीलाई राजीनामापत्र बुझाउँदै औपचारिक रूपमा पार्टी परित्यागको घोषणा गरेका हुन् । उनले बुझाएको राजीनामापत्रमा नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले मधेस प्रदेशमा गाएको ‘सागर के तुफान को भी हमने बस में किया है…’ भन्ने सायरी उद्धृत गर्दै अब उक्त गीत प्रचण्डको स्मृतिमा मात्र सीमित रहेको उल्लेख गरेका छन् ।
राजीनामापत्रमा अन्सारीले पार्टीले साहस, इमान र जोखिम—यी तीनवटै मूल्य त्यागिसकेको आरोप लगाएका छन् । पार्टीको वर्तमान राजनीतिक व्यवहार र आदर्शबीच गहिरो विरोधाभास रहेको भन्दै उनले त्यसको हिस्सा बन्न नसक्ने स्पष्ट पारेका छन् ।
‘म यो विरोधाभासको हिस्सा बन्न सक्दिनँ । यसै बोधका साथ म पार्टी सदस्यताबाट समाजवादी क्रान्ति जिन्दावाद भन्दै बिदा लिन्छु,’ अन्सारीले राजीनामापत्रमा उल्लेख गरेका छन् ।
उनको पार्टी परित्यागले मधेस प्रदेशको राजनीतिमा नयाँ तरंग पैदा भएको राजनीतिक विश्लेषकहरूको भनाइ छ ।
