काठमाडौँ । ऊर्जा, जलस्रोत तथा सिँचाइमन्त्री कुलमान घिसिङले आफ्नो पदबाट राजीनामा दिनुभएको छ। मन्त्री घिसिङले प्रधानमन्त्री निवास बालुवाटर पुगेर प्रधानमन्त्री सुशीला कार्कीसमक्ष राजीनामा पेस गर्नुभएको हो।
भौतिक पूर्वाधार तथा यातायात तथा सहरी विकास मन्त्रालयको समेत जिम्मेवारी सम्हाल्दै आउनुभएका घिसिङ गत भदौ ३० गते मन्त्रीमा नियुक्त हुनुभएको थियो। साढे तीन महिनाको अवधिमा उहाँले तीन वटा महत्वपूर्ण मन्त्रालयको नेतृत्व गर्नुभएको थियो।
प्रधानमन्त्री कार्कीले उक्त अवधिमा प्रभावकारी भूमिका निर्वाह गरेको भन्दै घिसिङलाई बधाई तथा धन्यवाद दिनुभएको प्रधानमन्त्रीको सचिवालयले जनाएको छ। “निकै प्रतिकूल अवस्थामा तपाईंले सरकारमा सामेल भएर देशका निम्ति ठूलो योगदान दिनुभयो,” प्रधानमन्त्री कार्कीले भन्नुभयो, “रातदिन नभनी खट्नुभयो, देशका विभिन्न भागमा पुग्नुभयो, विपद्का बेला सक्रिय रहनुभयो र विकास निर्माणका बेथितिविरुद्ध कठोर कदम चाल्नुभयो। यो कुरा देशले सम्झनेछ र जनताले मूल्याङ्कन गर्नेछन्।”
राजीनामा पेस गर्दै मन्त्री घिसिङले अन्तरिमकालमा काम गर्ने अवसर प्रदान गरेकोमा प्रधानमन्त्रीप्रति आभार व्यक्त गर्नुभएको छ।
उज्यालो पार्टी नेपालका संरक्षकसमेत रहनुभएका घिसिङ र राष्ट्रिय स्वतन्त्र पार्टी (रास्वपा)बीच पार्टी एकतासम्बन्धी समझदारी भइसकेको छ। सोही समझदारीअनुसार घिसिङ रास्वपाको उपाध्यक्ष बन्ने तय भएको जनाइएको छ।
