वीरगंज । जिल्ला प्रशासन कार्यालय, पर्साले वीरगंज महानगरपालिकाका केही क्षेत्रमा जारी गरिएको कर्फ्यू आदेश आज अपरान्ह ३:३० बजेदेखि हटाइएको छ।
जिल्ला प्रशासनका अनुसार जिल्ला सुरक्षा समितिको मिति २०८२/०९/२१ र २२ गतेको निर्णयअनुसार शान्ति सुरक्षा तथा सुव्यवस्था कायम राख्न सुरक्षा संवेदनशीलतालाई ध्यानमा राख्दै वीरगंज महानगरपालिकाका केही क्षेत्रमा निषेधाज्ञा तथा कर्फ्यू आदेश जारी गरिएको थियो।
आज बसेको सर्वदलीय तथा सर्वपक्षीय बैठकमा भएको सहमति, जिल्लाको शान्ति सुरक्षा अवस्था क्रमशः सुदृढ हुँदै गएको तथा नागरिकको स्वतन्त्र आवागमन, व्यापार–व्यवसाय र दैनिक गतिविधि निर्वाध रूपमा सञ्चालन गर्न दिनुपर्ने आवश्यकता रहेको भन्दै कर्फ्यू आदेश हटाउने निर्णय गरिएको हो।
जिल्ला प्रशासनले कर्फ्यू हटाइएसँगै सबै नागरिकलाई शान्ति, सद्भाव र कानूनको पालना गर्दै सामान्य जनजीवनलाई सहज बनाउन सहयोग गर्न अनुरोध पर्सा प्रमुख जिल्ला अधिकारी भोला दाहालद्वारा जारी सूचना मार्फत गरिएको छ ।
