वीरगंज । वीरगंज महानगरपालिकाको १९ औँ नगर अधिवेशन सम्पन्न भएको छ। अधिवेशनले यसअघि गएको असोजमा सम्पन्न विशेष अधिवेशनमार्फत कटौती गरिएको वडागत २५ प्रतिशत बजेटलाई पुनः थप गर्ने प्रस्ताव सर्वसम्मत रूपमा पारित गरेको छ।
गएको भदौ २३/२४ गते जेन्जी आन्दोलनका क्रममा महानगर क्षेत्रमा भएको क्षतिपछि असोजमा विशेष अधिवेशन आयोजना गरिएको थियो। उक्त अधिवेशनले महानगरपालिकाका संरचनामा व्यापक क्षति पुगेकाले पुनर्निर्माणलाई प्राथमिकतामा राख्दै सबै वडाको बजेटमा कटौती गर्ने निर्णय गरेको थियो।
महानगर प्रमुख राजेशमान सिंहका अनुसार पुनर्निर्माणका लागि आवश्यक स्रोत जुटाउन सफल भएपछि चालु आर्थिक वर्षका लागि १७ औँ अधिवेशनबाट छुट्याइएको वडागत बजेटलाई यथावत राख्ने निर्णय हालको अधिवेशनबाट पारित गरिएको हो।
अधिवेशनमा प्रमुख सिंहले चालु आर्थिक वर्षको आजसम्मको समग्र आय–व्यय विवरणसमेत प्रस्तुत गर्नुभयो। उहाँका अनुसार बिनियोजन गरिएको कुल ३ अर्ब २२ करोड रुपैयाँमध्ये हालसम्म १ अर्ब १३ करोड रुपैयाँ खर्च भएको छ। खर्च प्रतिशतका आधारमा हेर्दा कुल बिनियोजित बजेटको ३३ प्रतिशत खर्च भइसकेको छ। चालु खर्चतर्फ ३४.७८ प्रतिशत र पूँजीगत खर्चतर्फ ३२.६४ प्रतिशत खर्च भएको जानकारी दिइयो।
यसै आर्थिक वर्षभित्र महानगरपालिकाले शुलभ औषधि पसल सञ्चालन, प्रयोगशाला विस्तार तथा नगर अस्पताल सञ्चालनमा ल्याउने लक्ष्यसमेत राखेको छ।
अधिवेशनमा उपप्रमुख इम्तियाज आलम, प्रमुख प्रशासकीय अधिकृत अरविन्द लाल कर्ण, ३२ वटै वडाका वडाध्यक्ष, वडा सदस्यलगायतको उल्लेखनीय सहभागिता रहेको थियो।
