वीरगंज । आगामी निर्वाचनमा पुराना दलहरू पुनः भोट माग्न आए उनीहरूलाई कडा प्रश्न गर्न राष्ट्रिय स्वतन्त्र पार्टी (रास्वपा) पर्साका सभापति हरी पन्तले आमजनतासँग आग्रह गरेका छन्। वीरगञ्ज महानगरपालिका वडा नम्बर ४ र ५ को प्रथम भेलालाई सम्बोधन गर्दै पन्तले विगत ३५ वर्षदेखि पटक–पटक शासन सत्ताको केन्द्रमा रहेका पुराना दलहरूले अब जनतासमक्ष मत माग्ने नैतिक अधिकार समेत गुमाइसकेको बताए।
उनले देश र जनताको अपेक्षा पूरा गर्न असफल पुराना दलहरूलाई अब जनताले जवाफदेही बनाउनु आवश्यक रहेको उल्लेख गरे। परिवर्तन चाहने नागरिकहरू संगठित भई वैकल्पिक राजनीतिक शक्तिलाई मजबुत बनाउनुपर्नेमा पनि उनले जोड दिए।
उक्त भेलाले राष्ट्रिय स्वतन्त्र पार्टीको वीरगञ्ज महानगरअन्तर्गत वडा नम्बर ४ र ५ मा संगठन विस्तार गरेको छ। भेलाबाट वडा नम्बर ४ मा सञ्चारकर्मी मुकेश सिंहको सभापतित्वमा ११ सदस्यीय वडा समिति गठन गरिएको छ। समितिको उपसभापतिमा संगीता जोशी, सचिवमा पुकार थापा तथा सदस्यहरूमा शेख सहजाद, कृस्टा थापा, सुनिल दर्लामी, विजय चौहान, रोजन जोशी, प्रितम श्रेष्ठ, शंकर थापा र सरु जोशी रहेका छन्।
त्यसैगरी वडा नम्बर ५ मा इमरान शेखको सभापतित्वमा ११ सदस्यीय समिति गठन गरिएको छ। समितिको उपसभापतिमा अरुण मानन्धर, सचिवमा सकील अहमद तथा सदस्यहरूमा अमित जोशी, जमिर अख्तर, सुनिल सरार्फ, सरस्वती गुरुङ, जावेद अख्तर, शनि मानन्धर, सजाद अहमद र ओमी गुरुङ रहेका छन्।
रास्वपा वीरगञ्ज महानगर सभापति अमन आलमको सभापतित्वमा सम्पन्न उक्त भेलाको सहजीकरण मधेस प्रदेश संगठन विभाग उपप्रमुख प्रमोदले गरेका थिए। भेलामा महानगर उपसभापति परितोष द्विवेदीले स्वागत मन्तव्य राखेका थिए भने क्षेत्रीय सभापतिहरू राम आर्य, फैयाद मियाँ, महानगर सचिव गौतम श्रेष्ठ तथा नेताहरू परवेज अख्तर, नितु खड्गी, सुदिश प्रजापति, मुन्ना साहलगायतले मन्तव्य व्यक्त गरेका थिए।
