वीरगंज । भारतबाट नेपाल प्रवेश गर्ने प्रमुख नाका वीरगंजको सौन्दर्यकरण अभियानलाई निरन्तरता दिँदै वीरगंज महानगरपालिकाले शंकराचार्य प्रवेशद्वारदेखि वीरगंज भन्सार क्षेत्रसम्म वृक्षारोपण तथा सरसफाइ अभियान सुरु गरेको छ।
बुधबार मुख्य सडकको दायाँ–बायाँ दुबै किनारमा सरसफाइ गर्दै विभिन्न जातका बिरुवा रोपिएको हो। यसअघि वीरगंज–रक्सौल नाकास्थित मितेरी पुल क्षेत्रमा सरसफाइ, घाँस रोपण तथा वृक्षारोपण गरी सौन्दर्यकरण गरिरहेको महानगरपालिकाले उक्त अभियानलाई अब भन्सार क्षेत्रसम्म विस्तार गरेको जनाएको छ। नाका क्षेत्रलाई हराभरा, स्वच्छ तथा आकर्षक बनाउने उद्देश्यले कार्यक्रम सञ्चालन गरिएको महानगरपालिकाको भनाइ छ।
सामुदायिक प्रहरी सेवा केन्द्र ग्रिनसिटीको आयोजनामा सम्पन्न वृक्षारोपण कार्यक्रममा बोल्दै वीरगंज महानगरपालिकाका मेयर राजेशमान सिंहले सहरलाई स्वच्छ, हरित र वातावरणमैत्री बनाउने अभियान निरन्तर जारी रहने बताए। विकाससँगै वातावरण संरक्षण आजको आवश्यकता भएको उल्लेख गर्दै उनले यसका लागि सबै नागरिकको सक्रिय सहभागिता अपरिहार्य रहेकोमा जोड दिए।
मेयर सिंहले स्वच्छ वातावरण भावी पुस्ताका लागि छोड्नु वर्तमान पुस्ताको सामूहिक दायित्व भएको धारणा व्यक्त गरे।
कार्यक्रममा पर्साका प्रमुख जिल्ला अधिकारी भोला दहाल, पर्साका प्रहरी उपरीक्षक सुदिपराज पाठक, सशस्त्र प्रहरी नायब उपरीक्षक पुरुषोत्तम भण्डारी, वीरगंज भन्सार कार्यालयका कृष्णप्रसाद मैनाली, नेपाल इनोभेटिभ सोसाइटी पर्साका अध्यक्ष कमल चौगाई, ट्राफिक प्रहरी निरीक्षक प्रमुख युवराज कटुवाल लगायतको सहभागिता रहेको थियो।
