पाेखरिया । पर्साकाे जगरनाथपुर गाउँपालिका वडा नम्बर २ मा चेकजाँचका क्रममा लागुऔषध गाँजासहित एक जना भारतीय नागरिक पक्राउ परेका छन् ।
प्रहरीका अनुसार बुधबार दिउँसो करिब २:१५ बजे इलाका प्रहरी कार्यालय पाेखरिया तथा इलाका प्रहरी कार्यालय जानकीटोलाबाट खटिएको संयुक्त प्रहरी टोलीले जगरनाथपुरबाट जानकीटोला तर्फ आउँदै गरेको बीआर २२ बीएल ०६३२ नम्बरको मोटरसाइकललाई चेकजाँच गरेको थियो।
चेकजाँचका क्रममा मोटरसाइकल चालक भारत बिहार राज्य पश्चिम चम्पारण जिल्ला ग्राम पञ्चायत नरकटिया वडा नम्बर ११ निवासी अन्दाजी २६ वर्षीय सुमित कुमारको शरीर तलासी गर्दा प्लास्टिकले शरीरमा बेरेर ल्याइएको ३.१२० किलोग्राम लागुऔषध गाँजा जस्तो देखिने पदार्थ फेला परेको इलाका प्रहरी कार्यालय पाेखरियाले जनाएकाे छ । साथै चालकको साथबाट भारु २६ हजार ५०० नगदसमेत बरामद गरिएको छ ।
लागुऔषध, नगद तथा मोटरसाइकलसहित सुमितलाई नियन्त्रणमा लिई इलाका प्रहरी कार्यालय पोखरियामा राखी थप अनुसन्धान कार्य भइरहेको प्रहरी निरीक्षक प्रदीप पौडेलले जानकारी दिए ।
प्रहरीले सीमावर्ती क्षेत्रमा लागुऔषध ओसारपसार नियन्त्रणका लागि निगरानी तथा चेकजाँचलाई थप कडा बनाइएको जनाएको छ ।
