वीरगंज । सशस्त्र प्रहरी बल, नेपाल पर्साले १२० के.जी. प्रतिबन्धित लागुऔषध गाँजा बरामद गरेको छ।
सशस्त्र प्रहरी बल, नेपाल विओपी प्रसौनिभाठाबाट बुधबार खटिएको गस्ती टोलीले पर्सा जिल्लाको बिन्दवासिनी गाउँपालिका वडा नम्बर ५ प्रसौनिभाठा गाउँस्थित धुतहा खोलाको किनारबाट साे गाँजा बरामद गरेको हो।
गस्तीका क्रममा नेपालबाट भारततर्फ प्रतिबन्धित लागुऔषध बोकेर लैजाँदै गरेका केही व्यक्तिहरुले सुरक्षाकर्मीलाई देख्नासाथ ८ वटा प्लास्टिकका पोका छोडी फरार भएका थिए । उक्त पोकाहरु खोल्दा जम्मा १२० के.जी. लागुऔषध गाँजा फेला परेको सशस्त्र प्रहरीले जनाएको छ ।
बरामद गरिएको गाँजालाई आवश्यक कानुनी प्रक्रिया पूरा गरी थप अनुसन्धान तथा कारबाहीका लागि इलाका प्रहरी कार्यालय पोखरियामा बुझाइएको सशस्त्र प्रहरी बल, नेपाल नं. १३ गण हे.क्वा. पर्साका सूचना अधिकारी प्रहरी नायब उपरीक्षक विश्वराज योन्जनले जानकारी दिए ।
सशस्त्र प्रहरीले सीमावर्ती क्षेत्रमा लागुऔषध ओसारपसार नियन्त्रणका लागि निगरानी तथा गस्तीलाई थप कडा बनाइएको जनाएको छ ।
