वीरगंज । पर्साको जगरनाथपुर गाउँपालिका वडा नम्बर ४ सुहपुर सोहरीमा स्थानीय नागरिकको स्वास्थ्य सेवामा सहज पहुँच सुनिश्चित गर्न गाउँपालिकाले बुधबारदेखि सामुदायिक स्वास्थ्य सेवा इकाई सञ्चालनमा ल्याएको छ।
सुहपुर सोहरीमा नवनिर्मित सामुदायिक स्वास्थ्य सेवा इकाईको कार्यालय पूर्व उद्योग, वाणिज्य तथा आपूर्तिमन्त्री एवं पर्सा क्षेत्र नम्बर ४ का निवर्तमान सांसद रमेश रिजालले बुधबार औपचारिक रूपमा उद्घाटन गरेका हुन्।
उद्घाटन समारोहलाई सम्बोधन गर्दै पूर्वमन्त्री रिजालले गाउँघरमै सञ्चालनमा रहेका स्वास्थ्य संस्थाबाट पनि गुणस्तरीय सेवा उपलब्ध हुने भएकाले त्यसप्रति विश्वास राखी सेवा लिन स्थानीय बासिन्दालाई आग्रह गरे। शहरबजारका निजी अस्पतालमै मात्र राम्रो उपचार पाइन्छ भन्ने मानसिकता परिवर्तन गर्नुपर्नेमा उनले जोड दिए।
कार्यक्रममा बोल्दै जगरनाथपुर गाउँपालिकाका अध्यक्ष श्रीकान्त प्रसाद यादवले सामुदायिक स्वास्थ्य सेवा इकाईको स्थापनासँगै स्थानीय नागरिकले आफ्नै वडामै गुणस्तरीय स्वास्थ्य सेवा पाउने विश्वास व्यक्त गरे। उनले गाउँपालिकाले जनताको स्वास्थ्य, शिक्षा तथा आधारभूत सेवामा प्राथमिकता दिँदै विकासका कामलाई अघि बढाइरहेको बताए।
यसअघि वडा नम्बर ४ कै जगरनाथपुरमा मात्रै स्वास्थ्य चौकी सञ्चालनमा रहेकाले सोहपुर, सोहरी र हरपुर गरी तीन गाउँका स्थानीयबासीलाई उपचारका लागि जगरनाथपुर नै जानुपर्ने बाध्यता रहेको थियो। सो बाध्यतालाई हटाउन गाउँपालिका अध्यक्ष यादवको पहल र अग्रसरतामा सुहपुर सोहरीमा सामुदायिक स्वास्थ्य सेवा इकाईको कार्यालय निर्माण गरी सञ्चालनमा ल्याइएको प्रमुख प्रशासकीय अधिकृत सन्देश कुमार यादवले जानकारी दिए। उनका अनुसार यस इकाईबाट तीन गाउँका करिब २ हजारभन्दा बढी स्थानीय जनता लाभान्वित हुनेछन्।
गाउँपालिका अध्यक्ष श्रीकान्त प्रसाद यादवको अध्यक्षता तथा पूर्वमन्त्री रमेश रिजालको प्रमुख आतिथ्यतामा सम्पन्न उद्घाटन कार्यक्रममा गाउँपालिका उपाध्यक्ष बबीता सिंह क्षेत्री, प्रमुख प्रशासकीय अधिकृत सन्देश कुमार यादव, वडाध्यक्ष प्रभुनाथ नुनिया लगायतको उपस्थिति रहेको थियो।
उद्घाटनका अवसरमा निःशुल्क स्वास्थ्य शिविरसमेत आयोजना गरिएको थियो । शिविरमा वरिष्ठ कन्सल्टेन्ट फिजिसियन तथा टिबी/छाती रोग विशेषज्ञ डा. मनोज कुमार गुप्ता, वरिष्ठ हाडजोर्नी तथा नशा रोग विशेषज्ञ डा. निरेश कुमार कर्ण लगायत चिकित्सक तथा स्वास्थ्यकर्मीहरूको टोलीले विशेषज्ञ स्वास्थ्य सेवा प्रदान गरेको गाउँपालिकाका स्वास्थ्य शाखा प्रमुख प्रभेन्द्र साहले जानकारी दिए।
