वीरगंज । भारत–भुटान सीमासँग जोडिएको असमको तामूलपुर जिल्लाकी १७ वर्षीया नाबालिग किशोरी अञ्जली (नाम परिवर्तन) लाई पश्चिमी उत्तर प्रदेशको मुजफ्फरनगर जिल्लाबाट सकुशल उद्धार गरिएको छ । उक्त उद्धार संयुक्त तथा संवेदनशील मानवीय अभियान “मिसन निर्भया अपरेसन” अन्तर्गत सफलतापूर्वक सम्पन्न भएको हो ।
प्राप्त जानकारी अनुसार कक्षा ८ मा अध्ययनरत ती किशोरी करिब ६ महिना अघि अचानक बेपत्ता भएकी थिइन् । यस सम्बन्धमा असमको तामूलपुर थानामा उजुरी दर्ता गरिएको थियो । लामो समयसम्म खोजी गर्दा पनि कुनै पत्ता नलागेपछि मानव तस्करीको आशंका गहिरिँदै गएको थियो ।
अत्यन्तै गरिब तथा पीडित परिवारलाई सहयोग गर्ने उद्देश्यले असम सेन्टर फर रुरल डेभलपमेन्ट (ACRD Assam) ले उक्त विषय इन्स्पेक्टर मनोज कुमार शर्माको ध्यानाकर्षण गराएको थियो । साथै सीमावर्ती मुख्यालय सशस्त्र सीमा बल (SSB) तेजपुरलाई पनि लिखित जानकारी गराइएको थियो ।
मामलाको गम्भीरतालाई ध्यानमा राख्दै इन्स्पेक्टर मनोज कुमार शर्माले तत्काल अनुसन्धान सुरु गरे । परिवार, छिमेकी तथा विद्यालयका सहपाठीहरूसँग सोधपुछ तथा प्राविधिक विश्लेषण गर्दा एक शंकास्पद मोबाइल नम्बर फेला परेको थियो ।
अनुसन्धानका क्रममा उक्त नम्बरको लोकेशन दिल्ली नजिकै पश्चिमी उत्तर प्रदेशको मुजफ्फरनगर जिल्ला अन्तर्गत मन्सूरपुर थाना क्षेत्रको बेगराजपुर गाउँमा देखिएको थियो ।
यस संवेदनशील घटनामा मिसन मुक्ति फाउन्डेशन, नयाँ दिल्लीका निर्देशक वीरेंद्र सिंहले विभिन्न एजेन्सीहरूबीच समन्वय गरी अपराधीसम्म पुग्ने बाटो तयार गरेका थिए ।
राष्ट्रिय मानवअधिकार आयोग (NHRC) का सदस्य प्रियांक कानूनगोको निर्देशनमा SSB इंटेलिजेन्स युनिट (क्षेत्रीय मुख्यालय बेजपारा), मुजफ्फरनगर पुलिस (उत्तर प्रदेश), मिसन मुक्ति फाउन्डेशन, रेस्क्यू एन्ड रिलिफ फाउन्डेशन तथा मानव तस्करी विरोधी इकाई (SSB बेजपारा) को संयुक्त टोली गठन गरी विशेष अभियान सञ्चालन गरिएको थियो ।
अपरेसन दुई तहमा सञ्चालन गरिएको थियो, जहाँ एक टोली जमिनस्तरमा सक्रिय थियो भने अर्को टोली फोन तथा ह्वाट्सएपमार्फत प्राविधिक तथा समन्वय कार्यमा जुटिएको थियो । संयुक्त प्रयासको परिणामस्वरूप आरोपीलाई पक्राउ गरी नाबालिग किशोरीलाई सकुशल उद्धार गरिएको हो ।
उद्धारपछि किशोरीलाई आवश्यक चिकित्सकीय उपचार तथा मनोसामाजिक परामर्शका लागि सम्बन्धित निकायको जिम्मा लगाइएको छ । घटनासम्बन्धी विस्तृत प्रतिवेदन चाँडै सार्वजनिक गरिने जनाइएको छ ।
मानव तस्करी विरुद्धको अभियानमा यो सफल अपरेसन अन्तर–एजेन्सी समन्वय र द्रुत कार्यवाहीको सशक्त उदाहरण बनेको छ ।
