वीरगंज । निजी तथा आवासीय विद्यालय अर्गनाइजेसन नेपाल (प्याब्सन) पर्साद्वारा आयोजित हस्तलेखन तथा आर्ट प्रतियोगिता शुक्रबार सम्पन्न भएको छ ।
प्याब्सन पर्साका अध्यक्ष सरोज चौधरीको अध्यक्षतामा सम्पन्न प्रतियोगिताको उद्घाटन शिक्षा विकास तथा समन्वय इकाइ पर्साका प्रमुख मोती भट्टराईले गर्नुभएको थियो ।
२९ वटा विद्यालयका छात्र–छात्राको सहभागिता रहेको आर्ट प्रतियोगितामा लिटल एन्जल स्कुल प्रथम, एसआर ग्यालेक्सी स्कुल दोस्रो तथा द रोयल एकेडेमी तेस्रो स्थान हासिल गर्न सफल भएका छन् । उक्त जानकारी प्याब्सन पर्साका सचिव अशोक संग्रौलाले दिनुभयो ।
त्यसैगरी २६ वटा विद्यालयको सहभागिता रहेको हस्तलेखन प्रतियोगितामा साउथ जोन माध्यमिक विद्यालय प्रथम, गौतम माध्यमिक विद्यालय दोस्रो र डिएभी स्कुल तेस्रो भएका छन् ।
वीरगंजको आदर्शनगरस्थित रानीशती अतिथि सदनमा आयोजित प्रतियोगिताको उद्घाटन कार्यक्रममा प्याब्सनका केन्द्रीय उपाध्यक्ष किशोर गौतम, केन्द्रीय सदस्य थकिन कुमार गुरुङ, वीरगंज महानगरपालिकाका शिक्षा महाशाखा प्रमुख आनन्द लामिक्षानेलगायतले मन्तव्य राख्दै विद्यार्थीको सर्वाङ्गीण विकासका लागि यस्ता सिर्जनात्मक प्रतियोगिता आवश्यक रहेको धारणा व्यक्त गरेका थिए ।
