वीरगंज । पर्सा जिल्लाको वीरगंज माघी (खिचडी) पर्व २०८२ लाई भव्य र सभ्य रूपमा मनाउने उद्देश्यले नयाँ मूल समारोह समिति गठन गरिएको छ।
२०८१ पुस २ गते सम्पन्न एक भेलाबाट माघी (खिचडी) मूल समारोह समिति २०८२ गठन गरिएको हो। भेलामा नागरिक समाज, युवा, किसान तथा विभिन्न क्षेत्रका प्रतिनिधिहरूको उल्लेखनीय सहभागिता रहेको थियो।
भेलाले जङ्गबहादुर चौधरीलाई संयोजक (सभापति) चयन गरेको छ। यस्तै, शम्भु महतो चौधरी उप–संयोजक तथा मनोज चौधरी सह–संयोजकमा चयन भएका छन्।
विभिन्न क्षेत्रबाट प्रतिनिधित्व हुने गरी २० सदस्यीय समिति गठन गरिएको छ। नवगठित समितिले माघी पर्वलाई सांस्कृतिक, सामाजिक तथा ऐतिहासिक महत्वसहित मनाउने निर्णय गरेको जनाएको छ।
समितिका अनुसार माघी पर्वको अवसरमा सांस्कृतिक कार्यक्रम, परम्परागत भेषभूषा प्रदर्शन, परम्परागत खानाका स्टल तथा विविध जनचेतनामूलक कार्यक्रम आयोजना गरिनेछ। माघी पर्वमार्फत थारु समुदायसहित सम्पूर्ण समुदायबीच आपसी सद्भाव, एकता र सांस्कृतिक पहिचान प्रवर्द्धन गर्ने लक्ष्य लिइएको छ।
