काठमाडौं । नेकपा एमालेको ११औँ राष्ट्रिय महाधिवेशनअन्तर्गत नेतृत्व चयनका लागि भएको मतदान आज बिहान सम्पन्न भएको छ । नयाँ नेतृत्व चयनका लागि कुल २ हजार २६३ महाधिवेशन प्रतिनिधि चयन भएका थिए । तर, शतप्रतिशत मतदान हुन सकेन ।
निर्वाचन समितिका अनुसार कुल २ हजार २२७ मत मात्र खसेका छन् भने ३६ जना प्रतिनिधि मतदानमा अनुपस्थित भएका छन् । अनुपस्थित हुनेमध्ये पर्सा जिल्लाका चार जना महाधिवेशन प्रतिनिधि रहेका छन् ।
अनलाइन खबरका अनुसार पर्साबाट अनुपस्थित हुनेमा पूर्व संघीय मामिला तथा सामान्य प्रशासन मन्त्री तथा केन्द्रीय सदस्यका उम्मेदवार राजकुमार गुप्ता रहेका छन् । यस्तै, पर्साबाटै चुनिएका महाधिवेशन प्रतिनिधि राजेन्द्र प्रसाद यादव, अंशु आनन्द र मनोजकुमार गुप्ताले पनि मतदानमा सहभागिता जनाएनन् ।
पार्टीको महत्वपूर्ण राष्ट्रिय महाधिवेशनमा पर्साका चार प्रतिनिधि मतदानमा सहभागी नहुनु राजनीतिक वृत्तमा चासोको विषय बनेको छ । अनुपस्थितिको कारणबारे सम्बन्धित पक्षबाट औपचारिक प्रतिक्रिया भने आएको छैन ।
