वीरगंज । पर्सा जिल्लाको खुला सीमालाई केन्द्रमा राख्दै राजस्व चुहावट तथा चोरी तस्करी नियन्त्रणमा खटिएको सशस्त्र प्रहरी बल नेपाल नम्बर १३ गण हेडक्वाटर पर्साले चालु आर्थिक वर्षको झण्डै पाँच महिनाको अवधिमा उल्लेखनीय उपलब्धि हासिल गरेको छ। यस अवधिमा सशस्त्र प्रहरीले सीमावर्ती भारतीय बजारबाट भन्सार छली अवैध रूपमा भित्र्याइएका १३ करोड ६२ लाख ७२ हजार ६९५ रुपैयाँ मूल्य बराबरका विभिन्न सामान बरामद गरी वीरगंज भन्सार कार्यालयमा बुझाएको जनाएको छ।
सशस्त्र प्रहरी बल नेपाल नम्बर १३ गण हेडक्वाटर पर्साका गणपति तथा सशस्त्र प्रहरी उपरीक्षक पुरनचन्द्र भट्टका अनुसार सीमा निगरानी, सक्रिय गस्ती र रणनीतिक सुधारका कारण चोरी तस्करी नियन्त्रण प्रभावकारी बन्दै गएको हो। ‘गत आर्थिक वर्षमा हामीले २८ करोड ९२ लाख ५० हजार रुपैयाँ बराबरका अवैध सामान बरामद गरेका थियौँ,’ उनले भने, ‘चालु आर्थिक वर्षको हालसम्मको तथ्यांक हेर्दा यस वर्ष अझ बढी परिमाणमा बरामद हुने अपेक्षा गरेका छौँ।’
उनका अनुसार चालु आर्थिक वर्षको पाँच महिनामा मात्रै ८ करोड ५९ लाख ७२ हजार ७५० रुपैयाँ बराबरका बिलविजकभन्दा बढी मूल्यका सामान राजस्व अनुसन्धान कार्यालय पथलैयामा बुझाइएको छ। गत आर्थिक वर्षभरिमा भने यस्तो मूल्य ११ करोड ९९ लाख ४७ हजार १७८ रुपैयाँ रहेको थियो, जसले चालु आवमै उल्लेखनीय प्रगति भएको देखाउँछ।
भारतसँग १०७ किलोमिटर लामो खुला सीमाका कारण चोरी तस्करी नियन्त्रण चुनौतीपूर्ण भए पनि सशस्त्र प्रहरीले विशेष रणनीति अपनाएर काम गरिरहेको उपरीक्षक भट्टले बताए। तालिमप्राप्त कुकुरको प्रयोग, २४ घण्टा सीमा निगरानी, नियमित गस्ती तथा सूचनाको प्रभावकारी उपयोगले नियन्त्रण प्रयासलाई बलियो बनाएको उनले बताए। यसको सकारात्मक प्रभाव वीरगंज भन्सार कार्यालयको राजस्व संकलनमा समेत देखिएको छ।
वीरगंज भन्सार कार्यालयका अनुसार चालु आर्थिक वर्षको पहिलो चार महिनामै ७५ अर्ब ५९ करोड रुपैयाँ राजस्व संकलन भएको छ। गत आर्थिक वर्षको सोही अवधिमा ६६ अर्ब ७३ करोड रुपैयाँ मात्र संकलन भएकाले यस वर्ष १३ प्रतिशत अर्थात् ८ अर्ब ७६ करोड रुपैयाँ बढी राजस्व संकलन भएको हो।
बेमौसमी वर्षा, जेन–जी आन्दोलन तथा भारतको बिहार राज्यमा सम्पन्न विधानसभा निर्वाचनजस्ता प्रतिकूल अवस्थाका बाबजुद पनि राजस्व संकलन उत्साहजनक रहनु सकारात्मक पक्ष भएको उपरीक्षक भट्टले बताए। स्थानीय प्रशासन र नागरिकको सहयोगले चोरी तस्करी नियन्त्रणमा उल्लेखनीय सफलता मिलेको उनको भनाइ छ।
राजस्व तथा सीमा सुरक्षासँगै सशस्त्र प्रहरी बल पर्सा विपद् व्यवस्थापनमा पनि सक्रिय रहेको छ। गत असोज १८ र १९ गतेको बाढीका क्रममा डुबानमा परेका नागरिक तथा सुत्केरी महिलाको सफल उद्धार गरिएको थियो। यस्तै, अवैध हतियार नियन्त्रण अभियानअन्तर्गत कटुवा पेस्तोलसहित दुई जनालाई नियन्त्रणमा लिएर नेपाल प्रहरीको जिम्मा लगाइएको छ।
लागुऔषध नियन्त्रणतर्फ चालु आर्थिक वर्षको पाँच महिनामा ३५० किलोग्राम गाँजा र ३० दशमलव ९८ किलोग्राम चरेश बरामद गरिएको सशस्त्र प्रहरीले जनाएको छ। राजस्व संरक्षण, सीमा सुरक्षा, विपद् व्यवस्थापन र अपराध नियन्त्रणमा सशस्त्र प्रहरी बल पर्साको सक्रियता राज्यका लागि महत्वपूर्ण उपलब्धिका रूपमा देखिएको छ।
