वीरगंज । बाराको परवानीपुर गाउँपालिका–५ बहुअरीका युवा नेता तथा नेपाल रिटर्निङ एसोसिएसन समाजवादी, बाराका अध्यक्ष अनिल शाहको पहलमा परवानीपुर गाउँपालिका–१ मा शैक्षिक सामग्री वितरण कार्यक्रम सम्पन्न भएको छ ।
परवानीपुर–१ स्थित श्री नेपाल राष्ट्रिय आधारभूत विद्यालय, गौनहरीमा अध्ययनरत ७० जना विद्यार्थीलाई एक कार्यक्रमका बीच शैक्षिक सामग्री वितरण गरिएको हो ।
कार्यक्रमलाई सम्बोधन गर्दै नेपाल रिटर्निङ एसोसिएसन समाजवादीका केन्द्रीय अध्यक्ष प्रवीण पौडेलले आर्थिक रूपमा कमजोर विद्यार्थीहरूलाई निरन्तर सहयोग गर्ने प्रतिबद्धता व्यक्त गर्दै सरसफाइमा विशेष ध्यान दिन आग्रह गरे ।
युवा नेता तथा संघका बारा अध्यक्ष अनिल शाहले शिक्षाबाट वञ्चित विद्यार्थीलाई आवश्यक परेको समयमा आफ्नो साथ रहने आश्वासन दिँदै सो क्षेत्रमा बेरोजगार युवालाई रोजगारी प्रदान गरिएको र स्थानीय महिलाहरूलाई समेत रोजगारीका अवसर सिर्जना गरिएको जानकारी दिए ।
कार्यक्रममा विद्यालय व्यवस्थापन समितिका अध्यक्ष, शिक्षक–शिक्षिका, संस्थापक विद्यालय समितिका अध्यक्ष, स्थानीय युवा तथा समाजसेवीहरू साथै परवानीपुर–५ बहुअरीका युवा नेता सुरेन्द्र पटेलको उल्लेखनीय उपस्थिति रहेको थियो ।
