वीरगंज । पर्साकाे जगरनाथपुर गाउँपालिकाको दुई वडामा सम्पन्न निशुल्क आँखा शिविरबाट कुल ४६४ जना लाभान्वित भएका छन् ।
जगरनाथपुर गाउँपालिकाकाे वडा नं. ४ सुहपुरस्थित जनमत पार्टी कार्यालयको ग्राउण्डमा जनमत पार्टीको आयोजना तथा सामुदायिक आँखा केन्द्र वीरगंजको प्राविधिक सहयोगमा आयोजित शिविरमा १४७ जनाले सेवा लिएका हुन् । शिविरमा ३१ जना मोतियाविन्दका विरामी भेटिएका छन् भने २३ जनालाई निःशुल्क ड्रप वितरण गरिएको थियो ।
मोतियाविन्दका बिरामीहरूको यही मंसिर २४ गते बुधवार वीरगंजमा पूर्ण रूपमा निःशुल्क शल्यक्रिया गरिने जानकारी आँखा शिविरका को–अर्डिनेटर राजेश चौधरीले दिएका छन् । कार्यक्रमको नेतृत्व मधेश प्रदेश सदस्य बृजेश्वर प्रसाद चौधरीले गर्नुभएको थियो ।
यसअघि आइतबार वडा नं. २ पाणेपुरस्थित श्री नेरा प्रा. विद्यालयको प्राङ्गणमा सामाजिक संस्था ‘दाइजो एवं सामाजिक कुरीति विरुद्ध जागरण मञ्च’को आयोजना तथा केडिया आँखा अस्पताल परवानीपुरको प्राविधिक सहयोगमा सम्पन्न शिविरमा ३१७ जना लाभान्वित भएका थिए ।
सो शिविरमा १०७ जना मोतियाविन्दका बिरामी भेटिएका थिए भने ९४ जनालाई निःशुल्क ड्रप प्रदान गरिएको थियो ।
