वीरगंज । नेपाली कांग्रेस पर्सा प्रतिनिधि सभा क्षेत्र नं. ४ को क्षेत्रीय समितिको बैठक सोमबार सम्पन्न भएको छ । क्षेत्रीय सभापति श्रीकान्त प्रसाद यादवको अध्यक्षतामा बसेको बैठकले आगामी प्रतिनिधि सभा निर्वाचनका लागि क्षेत्र नं. ४ बाट निवर्तमान सांसद एवं कांग्रेसका केन्द्रिय सदस्य रमेश रिजालको एकल नाम सिफारिस गर्ने निर्णय गरेको हो ।
रिजाल पर्सा क्षेत्र नं. ४ का प्रत्यक्ष निर्वाचित प्रतिनिधि सभा सदस्य रहिसकेका छन् । आगामी निर्वाचनमा उनी नै सबैभन्दा उपयुक्त उम्मेदवार हुने निष्कर्षसहित बैठकले सर्वसम्मत रूपमा सिफारिस गरेको क्षेत्रीय सभापति यादवले बताएका छन् ।
जगरनाथपुर गाउँपालिका–५ धरमपुरमा सम्पन्न बैठकमा प्रदेश सभा सदस्य शंकर चौधरी, नेपाली कांग्रेस पर्साका प्रवक्ता रमेश पाण्डे, सह–सचिव नविन सिंह, क्षेत्रीय सचिव बलिष्टेर अहमद, क्षेत्र अन्तर्गतका गाउँपालिका तथा वडा सभापतिहरु, भातृ संगठनका प्रतिनिधिहरु उपस्थित रहेका थिए ।
