वीरगंज । सामुदायिक रेडियो नारायणी एफएमले आफ्नो २०औं वार्षिकोत्सवको अवसरमा आयोजना गरेको समाचार वाचन प्रतियोगिता आइतबार वीरगंज नगर सभा गृहमा सम्पन्न भएको छ ।
प्रतियोगितामा माधव तिमिल्सिना प्रथम, लक्ष्मी खरेल द्वितीय र सुर्यनारायण विक तृतीय घोषित भएका छन् । प्रथम तिमिल्सिनाले नगद २० हजार, खरेलले १५ हजार र विकले १० हजार रुपैयाँ पुरस्कार प्राप्त गरेका छन् ।
यसैगरी, उत्कृष्ट प्रस्तुति दिँदै सान्त्वना पुरस्कार हासिल गर्ने सुरेश बिडारी, बिमला गुप्ता र आर्जु देवकोटालाई जनही ५ हजार रुपैयाँ प्रदान गरिएको एफएमले जनाएको छ ।
कार्यक्रम नारायणी एफएमका कार्यकारिणी अध्यक्ष गोविन्द देवकोटाको अध्यक्षतामा तथा वीरगंज महानगरपालिका प्रमुख राजेशमान सिंहको प्रमुख आतिथ्यतामा सम्पन्न भएको थियो ।
कार्यक्रममा सखुवा प्रसौनी गाउँपालिकाका अध्यक्ष यसवन्त यादव, पर्साका प्रमुख जिल्ला अधिकारी भोला दाहाल, वीरगंज महानगरपालिकाका प्रमुख प्रशासकीय अधिकृत अरबिन्द लाल कर्ण, पर्सा प्रहरीका प्रमुख एसपी सुदिपराज पाठक, नेपाल पत्रकार महासंघका केन्द्रीय लेखा समिति संयोजक केसी लामिछाने, महासंघ मधेस प्रदेश अध्यक्ष श्याम बन्जारा तथा पर्सा जिल्ला अध्यक्ष ओमप्रकाश खनाल लगायतको उपस्थिति रहेको थियो ।
कार्यक्रमको सञ्चालन नारायणी एफएमका प्रबन्ध निर्देशक शिवनाथ यादवले गरेका थिए ।
