जनकपुरधाम । मधेस प्रदेशसभामा प्रतिनिधित्व गर्ने राष्ट्रिय प्रजातन्त्र पार्टी (राप्रपा) की महिला तर्फ समानुपातिक सांसद कञ्जन बिच्छालाई पदमुक्त गरिएको छ।
मधेस प्रदेशसभा सचिवालयले आज एक विज्ञप्ति जारी गर्दै बिच्छालाई प्रदेशसभा सदस्य पदबाट हटाइएकाे जानकारी सार्वजनिक गरेको हो।
राप्रपाले पार्टीको नीति विपरीत क्रियाकलाप गरेको आरोपस्वरूप बिच्छालाई यसअघि छ महिनाका लागि साधारण सदस्य पदबाट नै निलम्बन गरेको थियो। सोही आधारमा राप्रपा केन्द्रीय कार्यसम्पादन समितिको निर्णय अनुसार बिच्छालाई प्रदेशसभा सदस्यबाट निष्कासन गरिएको र सो सम्बन्धी पत्र सचिवालयमा प्राप्त भएको विज्ञप्तिमा उल्लेख छ।
प्रदेशसभा सचिवालयकाे भनाइअनुसार, राजनीतिक दलसम्बन्धी ऐन, २०७३ को दफा ३४ बमोजिम निलम्बित सदस्यलाई प्रदेशसभा सदस्य पदबाट हटाई आवश्यक कारबाहीकाे प्रक्रिया अघि बढाउन अनुरोध आएको हो।
प्रदेशसभा सञ्चालन नियमावली २०७५ को नियम १९० लगायतका कानुनी व्यवस्थाअनुसार बिच्छालाई सदस्य सूचीबाट हटाइएको सचिवालयले स्पष्ट पारेकाे छ। सार्वजनिक गरिएको विज्ञप्तिमा प्रदेशसभा सचिव बासुप्रसाद कोइरालाको हस्ताक्षर छ।
