वीरगंज । वीरगंज महानगरलाई हरियालीयुक्त, स्वच्छ र सौन्दर्यपूर्ण शहरका रूपमा विकास गर्ने लक्ष्यसहित सञ्चालन भइरहेको बृहत वृक्षारोपण तथा हरियाली संरक्षण अभियान लगातार ३४औँ दिन पनि सशक्त रूपमा अगाडि बढेको छ ।
वीरगंज महानगरपालिका, सशस्त्र प्रहरी बल नेपाल नं.१३ गण हेडक्वाटर पर्सा तथा ग्रीन सिटी सामुदायिक प्रहरी सेवा केन्द्र आदर्शनगर–१०को संयुक्त सहकार्यमा चलिरहेको अभियानले सीमाक्षेत्रको वातावरणीय सुधारमा उल्लेखनीय योगदान पुर्याइरहेको छ ।
आजको कार्यक्रममा भारतीय दूतावास बिरगंजका कन्सुल (ICS) मनिष कुमार दास विशेष अतिथिका रूपमा उपस्थित रहे । उनले अभियानको प्रशंसा गर्दै नेपाल–भारत सीमावर्ती क्षेत्रको वातावरणीय संरक्षण, मैत्रीपूर्ण सम्बन्ध र सामुदायिक सहकार्यमार्फत साझा फाइदा हुने बताए । दासले बिरुवा रोपेर मात्र नभई दीर्घकालीन संरक्षण र व्यवस्थापनमा ध्यान दिनुपर्नेमा जोड दिए ।
कार्यक्रममा नगर प्रहरी, सशस्त्र प्रहरी, सामुदायिक प्रहरीका पदाधिकारी, ग्रीन सिटी सेवा केन्द्रका प्रतिनिधि, स्थानीय अगुवाहरू तथा सञ्चारकर्मीहरूको सक्रिय सहभागिता थियो । सुरक्षानिकायका प्रतिनिधिहरूले सीमाको सुरक्षासँगै वातावरणीय जिम्मेवारी पनि महत्वपूर्ण रहेको जनाउँदै अभियानलाई निरन्तरता दिने प्रतिबद्धता व्यक्त गरे ।
अभियान सुरु भएको ३४ दिनको अवधिमा सयौँ बिरुवाहरू विभिन्न स्थानमा रोपिएका छन् । संरक्षण सुनिश्चित गर्न तारजाली, बाँस संरचना, नियमित सिँचाइ जस्ता व्यवस्थाहरू मिलाइएको आयोजक पक्षले जनाएको छ । स्थानीय बासिन्दा र व्यापारीहरूको बढ्दो सहभागिताले अभियान जनस्तरमा लोकप्रिय बन्दै गएको बताइएको छ ।
आगामी दिनमा जनचेतनामूलक कार्यक्रम, विद्यालयस्तरीय हरियाली गतिविधि तथा समुदायसँग समन्वय विस्तार गर्दै अभियानलाई अझ प्रभावकारी बनाइने जानकारी आयोजकहरूले दिएका छन् ।
वीरगंज महानगरपालिका तथा सुरक्षानिकायहरूको सहकार्यमा अघि बढिरहेको यो अभियानमा भारतीय दूतावास अधिकारीको सहभागिताले कार्यक्रमलाई थप ऊर्जा, प्रोत्साहन र अन्तर्राष्ट्रिय मित्रताको सन्देश दिएको आयोजकहरूको भनाइ छ ।
