वीरगंज । पर्साकाे बहुदरमाई नगरपालिका–४ डोकैला बहुअरी बजारमा यही मंसिर २२ गते आम जनता पार्टी (आजपा)को क्षेत्रीय भेला आयोजना हुने भएको छ । पर्सा क्षेत्र नं–२ मा हुने उक्त भेलामा आजपाका राष्ट्रिय अध्यक्ष एवं पूर्वमन्त्री प्रभु साहको विशेष उपस्थितिको तयारी भइरहेको पार्टीले जनाएको छ ।
भ्रष्टाचार विरुद्ध कडा खबरदारी गर्ने उद्देश्यसहित आयोजित क्षेत्रीय भेलाको तयारी तीव्र गतिमा अगाडि बढेको आजपाका मधेश प्रदेश अध्यक्ष उमेश कुशवाहाले बताए । उनका अनुसार बिहीबार विभिन्न टोल–बस्तीका युवाहरूसँग भेटघाट र परामर्श गरी संगठन विस्तार तथा भेला तयारीको समीक्षा गरिएको छ ।
उक्त भेटघाटमा आजपा केन्द्रिय सचिवालय सदस्य रन्जु साह, पर्सा जिल्ला इन्चार्ज लखिन्द्र साह, पर्सा जिल्ला अध्यक्ष बिशवराज पटेल लगायतको उपस्थिति रहेको थियो ।
प्रदेश अध्यक्ष कुशवाहाकाे भनाइमा, “जनताको अधिकार र परिवर्तनकाे पक्षमा आजपाले जनस्तरमा सशक्त अभियान सुरू गरेकाे छ । भ्रष्ट र विगतमा जनता साथ धोका गर्नेहरूसँग युवाहरू अब सम्झौता गर्दैनन् ।”
पार्टीले कार्यक्रमलाई भव्य र सभ्य ढंगले सम्पन्न गर्न स्थानीय कार्यकर्ता, युवाहरू र शुभेच्छुकहरूको सक्रिय सहभागिता सुनिश्चित गरिरहेको जनाएको छ ।
