वीरगंज । मधेस प्रदेशका मुख्यमन्त्री सरोजकुमार यादवले मंगलबार मदरसा शिक्षा सम्बन्धी विधेयकलाई सैद्धान्तिक स्वीकृति दिएपछि वीरगंजमा तीव्र विरोध भएको छ । निर्णयप्रति असन्तुष्टि जनाउँदै विश्व हिन्दू परिषद् नेपाल, वीरगंजले मुख्यमन्त्री यादवको पुत्ला दहनसहित बृहत् विरोध प्रदर्शन गरेको हो ।
सर्वोच्च अदालतको आदेश विपरीत मन्त्रिपरिषद् बैठक बसेर मुख्यमन्त्री यादवले ६ बुँदे निर्णय गरेको भन्दै प्रदर्शनकारीहरूले सवाल उठाएका छन् । उक्त बैठक मार्फत शिक्षा तथा संस्कृति मन्त्रालय, मधेस प्रदेशलाई मदरसा शिक्षा विधेयक तर्जुमा अगाडि बढाउन सैद्धान्तिक स्वीकृति प्रदान भएको थियो ।
यसअघि पनि लालबाबु राउत नेतृत्वको सरकारकालमा मदरसा शिक्षा विधेयक ल्याउने प्रयास भएको थियो । तीव्र विरोधका कारण त्यो बेला विधेयक स्थगित भएको स्मरण गर्दै प्रदर्शनकारीहरूले पुनः अघि सारिएको प्रयास विवादास्पद भएको तर्क गरेका छन् ।
वीरगंजकाे घन्टाघर क्षेत्रबाट निकालिएको मशाल जुलुसमा सहभागीहरूले शिक्षा प्रणालीलाई धार्मिक आधारमा विभाजन गर्ने षड्यन्त्र तत्काल रोक्न चेतावनी दिएका थिए । निर्णय प्रदेशको सामाजिक सद्भाव र संवेदनशीलतामाथि आघात पुग्ने भन्दै उनीहरूले विधेयक तत्काल खारेज गर्न माग गरे ।
मशाल जुलुसमा परिषद्का पदाधिकारी, स्थानीयवासी तथा समर्थकहरूको उल्लेखनीय सहभागिता रहेको थियाे ।
