काठमाडौं । अख्तियार दुरुपयोग अनुसन्धान आयोगले धनुषाको कमला नगरपालिकामा भएको सार्वजनिक सम्पत्ति हानिनोक्सानीसम्बन्धी भ्रष्टाचार प्रकरणमा तत्कालीन नगर प्रमुख राम उदगार गोइतसहित ११ जनाविरुद्ध विशेष अदालत काठमाडौंमा आरोप–पत्र दायर गरेको छ।
आयोगका अनुसार कमला नगरपालिका–३ लग्मा बजार नजिक रहेको पोखरीको डिलमा माटो पुर्ने, घाट निर्माण तथा सौन्दर्यकरण गर्ने आयोजना सम्बन्धी ठेक्का प्रक्रियामा अनियमितता गरिएको पाइएको छ। कम अंक कबोल गर्ने बोलपत्रदातालाई नदिई, बढी अंक कबोल गर्ने ईन्फ्रास्ट्रक्चर एस एण्ड बी बिल्डर्स प्रा.लि.लाई ठेक्का प्रदान गरी भ्रष्टाचार गरिएको आयोगले जनाएको छ।
भ्रष्टाचार निवारण ऐन, २०५९ को दफा १७ बमोजिम प्रतिवादीहरूबाट रु २९ लाख ४४ हजार १३७.२९ रकम विगो कायम गरिएको छ र कैद तथा जरिवाना सजायको मागदाबी विशेष अदालतमा गरिएको छ। साथै सोही ऐनको दफा २४ बमोजिम अतिरिक्त सजायसमेत माग गरिएको आयोगले स्पष्ट पारेको छ।
आयोगले मुद्दामा तत्कालीन नगर प्रमुखसहित १० जना कर्मचारी तथा पदाधिकारी र ईन्फ्रास्ट्रक्चर एस एण्ड बी बिल्डर्स प्रा.लि.लाई प्रतिवादीको रूपमा नामावलीमा समावेश गरेको छ।
