सेढवा । छिमेकी लघुवित्तीय वित्तीय संस्था लिमिटेड, सुवर्णपुर शाखाले आफ्नो २५औँ वार्षिकोत्सवको अवसरमा ठोरीस्थित वृद्धाश्रमलाई करिब २० हजार रुपैयाँ बराबरको खाद्यान्न सामग्री हस्तान्तरण गरेको छ।
सहयोगस्वरूप वृद्धाश्रमलाई १ क्विन्टल ५० किलोग्राम चामल, १ बोरा दाल, ५० किलोग्राम आलु, ३० किलोग्राम चिउरा, ५० किलोग्राम नुन, १५ लिटर खानेतेल र ४ पाकेट बिस्कुट उपलब्ध गराइएको संस्थाले जनाएको छ।
कार्यक्रममा संस्थाका विभागीय प्रमुख विश्वनाथ सिग्देलले २५औँ वर्षगाँठलाई सामाजिक उत्तरदायित्वसँग जोडेर अर्थपूर्ण बनाउन सहयोग गरिएको बताउँदै, “ज्येष्ठ नागरिकहरूको सेवामा योगदान दिन पाउँदा अत्यन्त खुशी लागेको छ,” भने।
सुवर्णपुर शाखाका प्रमुख ओमप्रकाश चौधरीले सेवा क्षेत्रभित्र रहेका ज्येष्ठ नागरिकहरूको खाद्यान्न आवश्यकतामा सहयोग पु–याउन पाउनु आफ्नो शाखाका लागि गर्वको विषय भएको बताए।
वृद्धाश्रमको तर्फबाट सन्तोष श्रेष्ठले छिमेकी लघुवित्तीय संस्थाप्रति धन्यवाद व्यक्त गर्दै, “यो सहयोगले आश्रमको दैनिक सञ्चालनमा ठूलो ऊर्जा र प्रेरणा मिलेको छ,” भन्दै संस्थाको सामाजिक पहलकदमीको प्रशंसा गरे।
