वीरगंज । सशस्त्र प्रहरी बल, नेपाल नं. १३ गण हे.क्वा. पर्साले सीमावर्ती क्षेत्रमा चोरी–तस्करी तथा लागुऔषध ओसार–पसार नियन्त्रणका लागि निरन्तर निगरानी र Intelligence Led Operation सञ्चालन गर्दै आएको छ। सोही अभियानअन्तर्गत मङ्सिर मंगलबार विशेष सूचनाका आधारमा गरेको अपरेशनमा ठूलो मात्रामा गाँजा बरामद गरिएको छ।
नं. १३ गणका गणपति सशस्त्र प्रहरी उपरीक्षक पुरनचन्द्र भट्टका अनुसार लागुऔषध दुर्व्यसनले समाजमा पार्ने गम्भीर प्रभावलाई ध्यानमा राख्दै प्रधान कार्यालयको निर्देशनअनुसार पर्सा जिल्लामा लागुऔषध नियन्त्रणलाई अभियानकै रूपमा सञ्चालन गरिएको बताए।
विशेष सूचनाका आधारमा खटिएको सशस्त्र प्रहरी निरीक्षक दिपेन्द्र प्रकाश मल्ल नेतृत्वको टोलीले पर्सा जिल्लाको बिन्दवासिनी गाउँपालिका–५ बटसौरामा खेतको परालको कुन्यु भित्र लुकाइ–छिपाई राखिएको अवस्थामा २१३ किलोग्राम (दुई क्विन्टल १३ किलोग्राम) गाँजा बरामद गरेको छ। गाँजा २० वटा पोकामा प्याक गरेर राखिएको पाइएको सशस्त्र प्रहरी नायब उपरीक्षक तथा सूचना अधिकारी विश्वराज योन्जनले जानकारी दिए।
सशस्त्र प्रहरीले घटनास्थलबाट बरामद लागुऔषध आवश्यक कानूनी प्रक्रिया पूरा गरी थप अनुसन्धानका लागि सम्बन्धित निकायलाई बुझाएको जनाएको छ।
