वीरगंज । विश्व हिन्दू परिषद् नेपाल, वीरगञ्ज महानगर समितिले श्री सीताराम विवाह महोत्सव तथा भारतको अयोध्यास्थित भव्य श्रीराम मन्दिरको शिखरमा धर्मध्वज स्थापना भएको पवित्र अवसरमा मंगलबार एक विशेष धार्मिक कार्यक्रम सम्पन्न गरेको छ।
यस अवसरमा परिषद्का पदाधिकारी तथा स्वयंसेवकहरूले वीरगञ्ज महानगरका विभिन्न टोल–बस्तीमा पुग्दै करिब ५०० भन्दा बढी सनातनी परिवारहरूको घर–घरमा भगवा ध्वज तथा शुभकामना पत्र वितरण गरेका छन्। परिषद्का अनुसार अभियानको उद्देश्य सनातन धर्मप्रतिको आस्था, एकता र धार्मिक चेतना वृद्धिमा योगदान पुर्याउनु रहेको छ।
धर्मध्वज वितरणका क्रममा सहभागी युवा, महिला समूह तथा धार्मिक व्यक्तित्वहरूले घरधनीहरूलाई श्रीरामको आदर्श, मर्यादा संस्कृति र धर्मध्वजको आध्यात्मिक महत्वबारे संक्षिप्त रूपमा जानकारी पनि गराएका थिए।
कार्यक्रमका संयोजकहरूले भने, “अयोध्यास्थित श्रीराम मन्दिरमा धर्मध्वज स्थापना सम्पूर्ण सनातनीहरूका लागि ऐतिहासिक र गौरवपूर्ण क्षण हो। यही उल्लासमा हामीले वीरगञ्जका घर–घरमा भगवा ध्वज फहराउँदै धार्मिक एकता र सांस्कृतिक पहिचानलाई थप मजबुत बनाईरहेका छौँ।”
स्थानीय बासिन्दाहरूले पनि परिषद्को यस पहलको स्वागत गर्दै आफ्नो घरमा भेटिएको भगवा ध्वज श्रद्धापूर्वक आरोहण गर्ने प्रतिबद्धता व्यक्त गरेका छन्।
कार्यक्रमलाई सफल बनाउन परिषद्का स्वयंसेवकहरूले विभिन्न वडामा टोली बनाएर निरन्तर वितरण कार्य सञ्चालन गरेका छन्। परिषद्का अनुसार यो अभियान आगामी दिनहरूमा अन्य क्षेत्रहरूमा पनि विस्तार गरिनेछ।
