काठमाडौँ । राष्ट्रिय प्रजातन्त्र पार्टी (राप्रपा)को केन्द्रीय अनुशासन समितिले पार्टीको निर्देशन बिनै मधेस प्रदेशको मन्त्री बनेकी सांसद कञ्चन विच्छालाई सांसद पदबाट हटाउन सिफारिस गरेको छ।
अनुशासन समितिकी अध्यक्ष रोशन कार्कीको अध्यक्षतामा बिहीबार बसेको बैठकले विच्छालाई सांसद पदबाट फिर्ता बोलाउने र पार्टीको साधारण सदस्य समेत नरहने गरी बर्खास्त गर्न सिफारिस गरेको प्रवक्ता मोहनकुमार श्रेष्ठले बताए।
श्रेष्ठका अनुसार समितिको निर्णय अब बस्ने कार्यसम्पादन समितिको बैठकले अनुमोदन गरेपछि लागू हुनेछ। उनले उक्त बैठक केही दिनभित्र बस्ने जानकारी दिए।
यसअघि राप्रपाले विच्छालाई २४ घण्टे स्पष्टीकरण सोधेको थियो। तर उनले समयसीमा भित्र जवाफ नदिएपछि पार्टी अध्यक्ष राजेन्द्र लिङ्देनले मन्त्रीबाट फिर्ता हुन निर्देशन दिएका थिए।
तर, विच्छाले पार्टीको निर्देशन बेवास्ता गर्दै सरोज कुमार यादव नेतृत्वको विवादित सरकारमा मन्त्री पद स्वीकार गरेकी थिइन्। मधेस प्रदेशमा राप्रपाबाट निर्वाचित एक्लो सांसद भएकी विच्छामाथि अब पार्टी कारबाही औपचारिक रूपमा लागू हुने बताइएको छ।
