वीरगंज । वीरगंज महानगरपालिका–२ छप्कैयामा बेवारिसे अवस्थामा सुटकेश फेला परेको छ।
मंगलबार साँझ करिब ६ बजे बिरयानी हाउस अगाडि बेवारिसे सुटकेश देखिएको सूचनापछि प्रहरी बिट छप्कैयाबाट प्रहरी हवल्दार रञ्जन राज पाण्डेको नेतृत्वमा खटिएको टोली घटनास्थल पुगेको जिल्ला प्रहरी कार्यालय पर्साले जनाएको छ।
सुटकेश शंकास्पद देखिएपछि प्रहरीले आसपासको क्षेत्रलाई सुरक्षा घेरामा राख्दै वडा प्रहरी कार्यालय विर्ताबाट प्रहरी निरीक्षक बिक्रम सुवेदीको नेतृत्वमा थप टोली खटाएको थियो । त्यसपछि श्री जनगण वीरगंजस्थित नेपाली सेनाको सात सदस्यीय बम डिस्पोजल टोलीलाई बोलाई उक्त सुटकेशलाई सुरक्षित रूपमा डिस्पोज (नष्ट) गरिएको हो।
बम डिस्पोजल टोलीले सुटकेश परीक्षण गर्दा कुनै विस्फोटक पदार्थ नपाइएको र तत्काल कुनै जोखिम नभएको पुष्टि भएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए । उनका अनुसार उक्त घटनाबारे थप अनुसन्धान जारी रहेको छ।
