वीरगञ्ज । प्रभु बैंक (पूर्व सेन्चुरी कमर्सियल बैंक) का प्रदेश प्रमुखमाथि पदको दुरुपयोग, कर्जा स्वीकृतिमा अस्वाभाविक सहयोग र पारिवारिक लाभका लागि राजनीतिक प्रभाव प्रयोग गरेको गम्भीर आरोप लगाइएको छ। यस विषयमा वीरगञ्जका जेन–जी युवाहरूले मंगलबार पर्साका प्रमुख जिल्ला अधिकारी (सिडिओ) भोला दाहाललाई ज्ञापनपत्र बुझाउँदै निष्पक्ष छानबिनको माग गरेका छन्।
ज्ञापनपत्रमा उल्लेख गरिएअनुसार, आरोपित प्रदेश प्रमुखले आफ्नो पद र राजनीतिक पहुँचको बलमा कर्जा स्वीकृति प्रक्रियामा हस्तक्षेप गर्दै विशेष व्यक्तिहरूलाई लाभान्वित पारेका थिए। साथै, आफ्नै भाइलाई बैंकको अर्को शाखामा शाखा प्रबन्धक बनाउन राजनीतिक दबाब प्रयोग गरेको आरोपसमेत लगाइएको छ।
त्यस्तै, कर्जा प्रकरणका प्रमुख लाभार्थीले कर्जा नतिर्ने उद्देश्यले छोरासँग औपचारिक सम्बन्ध विच्छेद गरेको विवरणसमेत सार्वजनिक भएको छ। यसलाई कर्जा तिर्ने जिम्मेवारीबाट पन्छिन अपनाइएको रणनीति भएको बताइएको छ।
जेन–जी युवाहरूले ज्ञापनमार्फत प्रभु बैंकका प्रदेश प्रमुख, उनका परिवारजन र सम्बन्धित पक्षहरूबीच भएको कर्जा स्वीकृति, माफी र पदोन्नति प्रक्रियाको पूर्ण विवरण सार्वजनिक गर्न माग गरेका छन्। साथै, स्वतन्त्र छानबिन समिति गठन गरी सम्पूर्ण प्रक्रिया पारदर्शी बनाउन, बैंकिङ प्रणालीमा राजनीतिक र पारिवारिक प्रभाव रोक्न स्थायी नीति लागू गर्न र प्रमाणित भएमा संलग्नमाथि बैंकिङ अपराध ऐनअनुसार कारबाही गर्नुपर्ने माग पनि राखिएको छ।
सिडिओ दाहालले ज्ञापनपत्र प्राप्त गर्दै यस विषयमा उच्च निकायमा जानकारी गराउने प्रतिबद्धता जनाएका छन्।
