वीरगंज । आम जनता पार्टी (आजपा)का मधेस प्रदेश अध्यक्ष उमेश कुशवाहाले मधेस प्रदेशसभा खारेज गर्न माग गरेका छन्।
कालिका टाईम्ससँग कुरा गर्दै अध्यक्ष कुशवाहाले भने, “आजको मधेस प्रदेशसभाको खेल देखेर मधेसका जनता निराश भएका छन्। अब ढिलो नगरी प्रदेशसभा खारेज गरी नयाँ जनादेशमा जानु जरुरी छ।”
उनले मधेस प्रदेशमा चलिरहेको राजनीतिक अस्थिरता र दलभित्रको अन्तर्कलहका कारण प्रदेशसभाप्रतिको जनविश्वास कमजोर बन्दै गएको बताएका छन्।
यसअघि मधेस प्रदेशका मुख्यमन्त्री जितेन्द्र सोनलले विश्वासको मत मागेका थिए। तर सत्तारूढ दलकै दुई सांसदले मत नदिने घोषणा गरेपछि मुख्यमन्त्री सोनलले राजीनामा दिएका छन्।
त्यस क्रममा प्रदेशसभा बैठकमै एक सांसदले आफैंलाई कालो मसो दल्ने घटनापछि राजनीतिक माहोल थप तातिएको छ।
अध्यक्ष कुशवाहाले यस्तो अवस्थाले जनताको अपेक्षा पूरा गर्न नसकेको भन्दै नयाँ जनादेशमार्फत स्थायी समाधान खोजिनुपर्ने धारणा व्यक्त गरेका छन्।
