वीरगंज । पर्साका नयाँ प्रमुख जिल्ला अधिकारी भोला दाहालले बिहीबार जिल्ला प्रशासन कार्यालयमा सञ्चारकर्मीहरूसँग परिचयात्मक तथा अन्तरक्रिया कार्यक्रम गरेका छन् । कार्यक्रममा उनले जिल्लाको शान्ति–सुरक्षा, आपराधिक गतिविधि नियन्त्रण र प्रशासनिक सेवा सुधारका विषयमा महत्वपूर्ण छलफल भएको बताए ।
कार्यक्रममा बोल्दै सीडिओ दाहालले आफू “नागरिकको सेवाका लागि आएको अधिकारी” भएको बताउँदै सेवामा कुनै पनि किसिमको ढिलासुस्ती हुन नदिने प्रतिबद्धता जनाए । उनले सरकारी सेवामा पर्सा आफ्नो चौथो कार्यस्थल रहेको उल्लेख गर्दै, यसअघि सप्तरीमा ११ महिना सीडिओको रूपमा काम गरेको अनुभवका आधारमा मधेसका जिल्लाहरूको समस्या राम्रोसँग बुझेको बताए ।
“समस्याको समाधानका लागि सकारात्मक सोच र सहकार्य जरुरी हुन्छ,” उनले भने, “म मेरो कार्यकालमा नागरिकलाई दुःख दिने काम हुन दिनेछैन।”
सीडिओ दाहालले जिल्लाको कानून–व्यवस्थाको अवस्था, आपराधिक गतिविधि नियन्त्रणका रणनीति र आगामी योजनाबारे जानकारी दिँदै, प्रशासन र सञ्चारकर्मीबीच निरन्तर संवाद र सहकार्य आवश्यक रहेको बताए ।
“कसैको दबाबमा आएर काम नगर्ने, सेवा ग्राहीको हकहितमा सहज र खुला प्रशासन सञ्चालन गर्ने मेरो प्राथमिकता हुनेछ,” उनले जोड दिए ।
दाहालले पर्साबासीलाई कुनै पनि समस्या वा गुनासो भए सीधै सम्पर्क गर्न आग्रह गरे । अन्तरक्रियाका क्रममा सञ्चारकर्मीहरूले खुला सिमाना, किसानका मुद्दा, सेवा प्रवाहमा सुधार, सार्वजनिक सुरक्षा, र प्रशासनिक पारदर्शिताका विषयमा सुझावहरू दिएका थिए ।
