वीरगंज । दैलेख जिल्ला डुङ्गेश्वर गाउँपालिकामा कार्यरत वरिष्ठ लेखा अधिकृत टंकबहादुर कार्कीविरुद्ध घुस लिएको आरोपमा अख्तियार दुरुपयोग अनुसन्धान आयोगले विशेष अदालत काठमाडौंमा आरोपपत्र दायर गरेको छ।
आयोगका अनुसार कार्कीले गाउँपालिकाको सडक स्तरोन्नती तथा निर्माण सम्पन्नपछि अन्तिम बिल भुक्तानीको प्रक्रिया अघि बढाइदिने भन्दै सेवाग्राहीसँग एक लाख रुपैया घुस मागी लिएको अवस्थामा अख्तियारको टंगाल र सुर्खेत कार्यालयबाट खटिएको संयुक्त टोलीले नियन्त्रणमा लिएको थियो।
अनुसन्धानबाट कार्कीले डुङ्गेश्वर गाउँपालिकाको वडा नं. १ देखि ५ सम्म पर्ने जर्सीचोक–देउली–जडी सडक स्तरोन्नती योजनाको अन्तिम भुक्तानी प्रक्रियामा सहजीकरणका नाममा घुस मागेको पुष्टि भएको आयोगले जनाएको छ।
आयोगले उनलाई भ्रष्टाचार निवारण ऐन, २०५९ को दफा ३ (१) बमोजिमको कसूरमा एक लाख बिगो कायम गरी कैद र जरिवानाको मागसहित बिहिबार विशेष अदालत, काठमाडौंमा आरोपपत्र दायर गरेको अख्तियार दुरुपयोग अनुसन्धान आयोगका प्रवक्ता राजेन्द्र कुमार पौडेलले जानकारी दिए ।
